अन्नपूर्ण बेस क्याम्पमा १ को निधन २ घाइते

समाधान संवाददाता २०७६ कार्तिक ७ गते १४:०४

समाधान संवाददाता
पोखरा

अन्नपूर्ण बेस क्याम्पतर्फ घुम्न गएका १ युवकको बुधबार हिमपहिरोमा परी निधन भएको छ । पोखरा ५ पस्र्याङका १८ वर्षीय सञ्जय खनाल रहेको प्रहरीले जनाएको छ ।

सञ्जयसँगै गएका अन्य २ युवा गम्भीर छन् । घाइते भएका पस्र्याङका १८ वर्षीय निरञ्जन कोइराला र पोखरा फुलबारीका २० वर्षीय सन्तोष बास्तोलाको मणिपाल शिक्षण अस्पतालमा उपचार भइरहेको छ ।

Advertisement

व्यक्तिगत तरिकाले घुम्न गएका उनीहरुलाई अर्को टोलीले हिमपहिरोमा परेको थाहा पाएपछि मात्रै प्रहरीसँग सम्पर्क भएको थियो ।

घाइतेलाई तत्कालै हेलिकोप्टरद्वारा उद्धार गरिएको कास्की प्रहरी प्रमुख दानबहादुर कार्कीले जानकारी दिए । घटनास्थलमै निधन भएका खनालको शव भने ल्याउन नसकिएको उनले बताए । ‘शव घटनास्थलमै छ, मौसम खराबीका कारण आज ल्याउन सकिएन,’ कार्कीले भने । भोलिमात्रै शव पोखरा ल्याइने प्रहरीले बताएको छ ।

Advertisement

उनीहरु सोमबार ट्रेकिङका लागि गएका थिए । अन्नपूर्ण बेस क्याम्पमा ट्रेकिङ गएका युवा बगरमा हिउँको ओडारमा फोटो खिच्ने क्रममा हिउँको ढिस्को खसेपछि पुरिएको प्रहरीले जानकारी दिएको छ ।

तपाईको प्रतिक्रिया