समाधान संवाददाता, पाेखरा

बागलुङ प्रदेश सभा २ ‘ख’ बाट निर्वाचित जनमोर्चाका खिमविक्रम शाहीले पद तथा गोपनीयताको सपथ लिएका छन् । गण्डकी प्रदेश सभामुख नेत्रनाथ अधिकारीबाट उनले बिहीबार पद तथा गोपनीयताको सपथ लिएका हुन् । सभामुख अधिकारीले ‘ईश्वरका नाममा’ भनेर वाचन गर्दा उनले ‘जनताका नाममा’ उच्चारण गरेका थिए ।

मंसिर १४ गते सम्पन्न उपनिर्वाचनमा सत्तारुढ नेकपा र राष्ट्रिय जनमोर्चाका तर्फबाट साझा उम्मेदवारको रुपमा उनी विजयी भएका हुन् । २ हजार ९७ मतान्तरमा उनले मुख्य प्रतिस्पर्धी कांग्रेसका जीतबहादुर शेरचनलाई पराजित गरेका हुन् । शाहीले ११ हजार २ सय ३५ मत पाउँदा कांग्रेस उम्मेदवार शेरचनले भने ९ हजार १ सय ३८ मत पाए ।

२०७४ को स्थानीय तह निर्वाचनमा बागलुङ निसीखोला गाउँपालिका अध्यक्षमा पराजित खिमविक्रम शाहीलाई वामगठबन्धनका तर्फबाट साझा उम्मेदवार बनाइएको थियो । उनी कांग्रेसका तारानाथ पौडेलसँग पराजित भएका थिए । राष्ट्रिय जनमोर्चाकै तर्फबाट २०७४ मा उक्त क्षेत्रबाट निर्वाचित टेकबहादुर घर्तीमगरको निधनपछि रिक्त पदमा जनमोर्चाकै शाहीलाई उम्मेदवार बनाइएको थियो ।

सपथपछि मुख्यमन्त्री पृथ्वीसुब्बा गुरुङले प्रदेश सरकार र प्रदेशसभाप्रति जनगुनासो बढेका बेला गरिमा बढ्ने गरी काम गर्न शुभकामना दिए । उनले भने, ‘गणतन्त्रलाई सुदृढ गराउन प्रदेश सभाले वान्छित सफलता पाउन सकेको छैन, समीक्षा गर्ने बेला भएको छ ।’ सुशासन स्थापित गर्न के कस्ता कानुन बनाइयो, सुखी नेपाली समृद्ध नेपालको अवधारणामा कति काम गर्न सकियो भनेर सोच्न उनले प्रदेशसभा सचिवालयसँग आग्रह गरे । उनले भने, ‘सबै खालका समस्या समाधानको थलो सडक र आन्दोलन होइन, संसद हो भनेर जस्टिफाइ हामीले गर्न सक्नुपर्छ ।’

कानुन निर्माणमो मुख्य दायित्वका साथ आएको सांसदले मेयर र मन्त्रीको जस्तो भूमिका नखोज्न पनि उनको आग्रह थियो । संघदेखि प्रदेशसम्मका सांसदलाई संघीयताबारे अभिमुखीकरण आवश्यक रहेको भन्दै उनले पञ्चायतको विरासत बहुदलमा, बहुदलको विरासत लोकतन्त्रमा देखिएकाले यस्तो प्रवृत्तिको अन्त्य हुनुपर्नेमा जोड दिए ।

सभामुख नेत्रनाथ अधिकारीले संविधान प्रदत्त अधिकार रक्षाका लागि प्रदेश सभा सदस्यहरु लागीपर्नु आग्रह गरे । प्रदेश सभा सार्वजनिक लेखा समिति सभापति कुमार खड्काले गन्तव्यमा पुग्ने बाटोमा नवनिर्वाचित सदस्य शाहीको योगदानको अपेक्षा गरिएको बताए । राजनीति र सदन फरक पाटा भएकाले कतिपय अवस्थामा दलीय आग्रहबाट माथि उठ्दै जनताका समस्यालाई सर्वोपरी ठानेर काम गर्नुपर्ने सुझाव उनले दिए ।