पोखरामाथि चितवनको सहज जित

समाधान संवाददाता २०७६ पुष २ गते १२:०७

समाधान संवाददाता
पोखरा

दोस्रो संस्करणको पोखरा प्रिमियर लिग (पिपिएल) टि– २० क्रिकेटमा सोमबारको खेलमा चितवन राइनोजले जित हात पारेको छ । पोखरा विरुद्ध ६ विकेटको सहज जित निकाल्दै प्रतियोगिताको पहिलो खेलमा चितवनले विजयी सुरुवात गरेको हो ।

टस जितेर पोखरालाई ब्याटिङको निम्तो दिएको चितवन पोखरालाई १ सय ७ रनमा रोक्न सफल भयो । सामान्य लक्ष्य पछ्याएको चितवनले ४ विकेट क्षतिमा १४ ओभर ५ बलमै भेट्टायो ।

बाबर हायतको उत्कृष्ट ब्याटिङमा चितवनको सहज जित साकार भयो । उनले चितवनलाई अविजित ६६ रनको योगदान गरे । बाबरले ४२ बलमा ६ चौका र ४ छक्का हिर्काए । प्लेयर अफ दि म्याच बाबरले प्राप्त गरे । ओपनर ब्याट्सम्यान अनिल साह क्रिजमा टिक्न सकेनन् । उनी २ बलको सामना गर्दा शून्य रनमै आउट भए । रोहन मुस्तफाले चितवनका लागि थप ११ रन जोडे ।

खेलमा कप्तान पारस खड्का ४ र आरिफ शेख १ रन बनाएर आउट भए । उनीहरु दुवैलाई सर्वजीत लड्डाले आउट गराए । चितवनका लागि सन्नी पटेलले अविजित २२ रनको योगदान गरे । उनले १८ बलमा १ चौका र २ छक्का प्रहार गरे । पटेलले बाबरसँग पाँचौं विकेटका लागि ५० रनको साझेदारी गरेका थिए । बलिङतर्फ पोखराका रासिद खान र सर्वजित लड्डाले समान २ विकेट हात पारे ।

शरद भेषावाकरको कप्तानी रहेको साविक विजेता पोखरा पल्टनले उद्घाटन खेलमा जस्तो प्रदर्शन गर्न सकेन । प्रतियोगिताको पहिलो खेलमा पोखराले काठमाडौं गोल्डेन वारियर्समाथि ९ विकेटको विशाल जित हात पारेको थियो । सोमबारको खेलमा भने कप्तान भेषावकरले ३९ बलमा ४५ रनमात्रै बनाए । कुशल भुर्तेल ५, कुशल मल्ल १३, आसिफ शेख, रवि इन्दर सिंह र रशिद खानले समान १० रन बनाए ।

चितवनका सन्नी पटेल, रोहन मुस्तफा र भुवन कार्कीले समान २ विकेट दिलाए । विक्रम शोब, करन केसी र कप्तान पारस खड्काले पनि समान १ विकेट लिए ।

बुधबार २ खेल हुने भएका छन् । पहिलो खेलमा काठमाडौं गोल्डेन वारियर्सले धनगढी ब्लुजको सामना गर्ने छ । दोस्रो खेलमा विराटनगर टाइटन्सले पोखरा पल्टनसँग प्रतिस्पर्धा गर्दै छ ।

तपाईको प्रतिक्रिया