पन्छाइयो मुक्तिनाथ सडकको हिउँ

समाधान संवाददाता २०७६ पुष १० गते १२:५८

कागबेनी–मुक्तिनाथ सडकको हिउँ पन्छाउँदै स्थानीय र कर्मचारी । तस्बिरः तारानाथ अधिकारी

एसके थकाली
जोमसोम

हिमपातका कारण अवरुद्ध मुस्ताङ कागबेनी–मुक्तिनाथ कालोपत्रे सडक मंगलबार देखि सुचारु भएको छ । वारागुङ मुक्तिक्षेत्र १ का स्थानीय जनप्रतिनिधि र कर्मचारी मिलेर सडकको हिउँ पन्छाएपछि सडक खुलेको हो ।

दोहोरो आवागमन खुलाउन अन्नपूर्ण संरक्षण क्षेत्र आयोजना (एक्याप) को पर्यटन सूचना केन्द्रका कर्मचारी, झारकोट स्वास्थ्य चौकीका स्वास्थ्यकर्मी, वडा प्रतिनिधि, कर्मचारी र स्थानीय हिउँ पन्छाउन सघाएको झारकोट स्वास्थ्य चौकीका अहेब तारानाथ अधिकारीले बताए ।

गतहप्ता परेको भारी हिमपातका कारण हलुका सवारी साधन र मोटरसाइकल आउजाउमा समस्या परेको थियो । सडकको हिउँ पन्छाएपछि सबै सवारी साधनलाई मुक्तिनाथ जान सजिलो भएको मुक्तिनाथ पर्यटन सूचना केन्द्रका पर्यटन सहायक प्रेम बस्नेतले बताए ।

कागबेनीदेखि झारकोटसम्म करिब ५ किलोमिटर सडक हिमपातले सवारी आवागमनमा बाधा पुगेको थियो । मुक्तिनाथमा अधिकतम माइनस ५ देखि अधिकतम माइनस १५ डिग्री सेन्टिग्रेट छ । चिसोले धारा र शौचालयको पानीसमेत जमेर कठिनाई भएको छ ।

तपाईको प्रतिक्रिया