म्युजिक अवार्ड वितरण

समाधान संवाददाता २०७६ पुष १३ गते १३:०८

समाधान संवाददाता, पोखरा

नेपाल संगीत तथा नाट्य प्रज्ञाप्रतिष्ठानका पूर्वउपकुलपति एवं संगीतकार शम्भुजित बास्कोटाले ‘फेवातालको आँगनमा लै लै माछापुच्छ्रे छाँया, जीवन मेरो सेती बगर बिनातिम्रो माया’ गाएपछि कार्यक्रम सुरु भयो ।

बक्स अफिस इन्टरनेसन गु्रपको आयोजनामा राष्ट्रको सर्वश्रेष्ठ म्युजिक अवार्ड फेवातालको किनारमा वितरण गरिएको थियो । सोही कार्यक्रमको उद्घाटन शनिबार बास्कोटाले उक्त गीत गाएर गरेका हुन् । ५ दर्जनभन्दा बढी गायक, गायिका, नायक, नायिका, मोडेल, संगीतकार, निर्देशक र सिनेमाकर्मी उक्त अवार्डबाट सम्मानित भएका छन् ।

कलाकारहरुलाई कदरपत्र प्रदान गरेपछि बास्कोटाले भने ‘कलाकारले संघर्ष गरे परिणाम सुन्दर हुन्छ, आफूले हिँडेको बाटोमा विचलित नभई यात्रा गर्दा नै गन्तव्यमा पुगिन्छ ।’ नेपाली चलचित्र र गीत संगीतको फाँटमा एक दशक लामो योगदान दिएका कारण पोखराका गायक तथा चलचित्रकर्मी सोभित बस्याल र सिनेकर्मी गणेश ढकाललाई कदरपत्रसहित सम्मान गरिएको थियो ।

भिजिट नेपाल २०२० को सन्दर्भमा आन्तरिक पर्यटन विकास र विस्तार गर्ने उद्देश्यले कार्यक्रम फेवा किनारमा गरिएको जानकारी आयोजक आरके सुवेदीले दिएका थिए । नेसनल बक्स अफिस म्युजिक भिडियो अवार्ड–२०१९ को वितरण कार्यक्रम रामबहादुर सुवेदीको सभापतित्वमा भएको थियो । सञ्चालन चलचित्र निर्देशक सोभित बस्नेतले गरेका थिए ।

तपाईको प्रतिक्रिया