बन्दीपुर प्रबद्र्धन गर्न म्याराथन

समाधान संवाददाता २०७६ पुष १३ गते १४:२५

कृष्ण न्यौपाने
दमौली

तनहुँको पर्यटकीय नगरी बन्दीपुरको पर्यटन प्रबद्र्धन गर्ने उद्देश्यले तेस्रो मिनी म्याराथन प्रतियोगिता हुने भएको छ । बन्दीपुर गाउँपालिकाले माघे संक्रान्ति पर्वको अवसर पारेर माघ १ गते मिनी म्याराथन दौड प्रतियोगिता आयोजना गर्न लागेको हो ।

नेपाल भ्रमण वर्ष २०२० लाई सफल बनाउन र बन्दीपुरका सम्पदालाई विश्वमाझ चिनाउन म्याराथन गर्न लागिएको गाउँपालिकाका अध्यक्ष पूर्णसिं थापाले जानकारी दिए । थापाले भने, ‘म्याराथन दौडले व्यक्तिको शारीरिक विकासको साथसाथै बन्दीपुरको पर्यटन प्रबद्र्धनमा समेत टेवा पुग्ने विश्वास गरेका छौं ।’

गाउँपालिका वडा नं १ डुम्रेबजारदेखि वडा नं ४ टुँडिखेलसम्मको ८ किमीको म्याराथन दौडमा आन्तरिक र खुला धावक सहभागी हुन सक्ने छन् । आन्तरिकतर्फ गाउँपालिकाभित्र बसोबास गर्ने धावकलाई सहभागी गराइने र खुलामा देशभरका धावक सहभागी हुन सक्ने छन् ।

खुलातर्फको दौडमा प्रथम र द्वितीय हुनेलाई क्रमश ३० हजार र १५ हजार साथै आन्तरिकतर्फको दौडमा प्रथम र द्वितीय हुनेलाई क्रमश १५ हजार र ७ हजार नगद प्रदान गरिने गाउँपालिकाका अध्यक्ष थापाले बताए । आन्तरिक र खुला गरी करिब २ सय धावक सहभागी हुने अनुमान गरिएको छ । गत वर्ष आयोजित प्रतियोगितामा ९० धावकले सहभागिता जनाएका थिए ।

‘खेलकुदको माध्यमबाट पनि बन्दीपुरमा पर्यटक भित्र्याउन प्रत्येक वर्ष माघे संक्रान्तिमा दौड प्रतियोगितालाई निरन्तरता दिन्छौं,’ गाउँपालिकाका प्रमुख प्रशासकीय अधिकृत नरहरि सापकोटाले भने । प्रतियोगिता गर्नका लागि करिब ४ लाख खर्च हुने अनुमान छ ।

एकल पुरुषलाई सिरक
गाउँपालिकाले सोही अवसरमा एकल पुरुषलाई सिरक वितरण गर्ने भएको छ । गत वर्ष एकल महिलालाई सिरक वितरण गरेको गाउँपालिकाले यो पटक एकल पुरुषलाई न्यानो कपडा वितरण गर्न लागेको हो ।

एकल पुरुषको अवस्था पनि दयनीय रहेकाले ७० वर्ष कटेका उकल पुरुषलाई सिरक वितरण गर्न लागिएको गाउँपालिकाका अध्यक्ष थापाले जानकारी दिए । गाउँपालिकाभित्र ६ वडामा बसोबास गर्ने ६ सय एकल पुरुषलाई न्यानो कपडा वितरण गर्न लागिएको हो । गाउँपालिकाले गत वर्ष २ सय ४० जना एकल महिलालाई कम्बल वितरण गरेको थियो । बन्दीपुरलाई पर्यटनको माध्यमबाट परिचित गराउन गाउँपालिकाले विभिन्न कार्यक्रम आयोजना गरिरहेको छ । गाउँपालिकाले गत वर्ष बन्दीपुर गाउँपालिका ४ विमलनगरस्थित सिद्धगुफाभित्र टेबलटेनिस प्रतियोगिता र कवितावाचन प्रतियोगिता गरिसकेको छ ।

तपाईको प्रतिक्रिया