सेतीमा धकेलेर मार्नेलाई जन्मकैद

समाधान संवाददाता २०७६ पुष २२ गते १३:५४

कृष्ण न्यौपाने
दमौली

तनहुँको व्यास नगरपालिका ४ बाघभन्ज्याङ बस्ने रामबहादुर परियारको हत्या अभियोगमा पुर्पक्षका लागि थुनामा रहेका ३ जना अभियुक्तमध्ये २ जनालाई जन्मकैद फैसला भएको छ । जिल्ला न्यायधाीश दुर्गाप्रसाद ढुंगेलको इजलासले परियारको हत्यामा संलग्न रहेका व्यास नगरपालिका ४ बस्ने भारती परियार र मंगलबहादुर दमैलाई जन्मकैद फैसला सुनाएको हो । सोही अभियोगमा थुनामा रहेका सुकबहादुर परियारलाई ३ वर्ष कैद फैसला भएको जिल्ला अदालतका स्रेस्तेदार सुदर्शन खनालले जानकारी दिए ।

२०६८ साउन ९ गते भारतीको योजनामा मंगलबहादुर र सुकबहादुरले रामबहादुरलाई शुक्लागण्डकी नगरपालिकाको दुलेगौडास्थित सेती नदीको पुलबाट धकेलेर हत्या गरेको अनुसन्धानबाट खुलेको थियो । प्रहरीले अभियुक्तहरुलाई गत वर्ष पुस २९ गते पक्राउ गरेको थियो ।

हत्यामा संलग्न भारती मृतकका बुहारी हुन् भने दमै मृतकका भान्जा हुन् । मृतककी श्रीमती सनिसरा परियारले आफ्ना श्रीमान् सुकबहादुर र मंगलबहादुरसँग घरबाट दुलेगौडा जान भनी हिँडेकोमा बेपत्ता भएकाले अनुसन्धान गरी खोजतलास गरी पाऊँ भनी २०७१ मंसिर १४ गते जिल्ला प्रहरी कार्यालय तनहुँमा निवेदन दिएकी थिइन् ।

प्रहरीले घटनाको अनुसन्धान गर्दै जाँदा मृतक रामबहादुरको हत्या भारतीको योजनामा भएको पत्ता लगाएको थियो । भारतीले सुकबहादुर र मंगलबहादुरलाई ५÷५ हजार दिएर रामबहादुरको हत्या गर्न लगाएको अनुसन्धानबाट खुलेको छ । जेठाजु बुहारी नाता पर्ने भारती र मृतक रामबहादुरबीच बढी हिमचिम रहेको, उनीहरु घुम्नका लागि काठमाडौसम्म जाने गरेको बताइएको छ । यस्तो सम्बन्धपरिवारका अन्य सदस्यले थाहा पाएका कारण पतिसँग सम्बन्ध बिग्रने डरले भारतीले रामबहादुरको हत्याको योजना बनाएको प्रहरीले जनाएको छ ।

सुकबहादुर र मंगलबहादुरले रामबहादुरलाई साउन ९ गते दुलेगौंडा पारी रहेको दिदीको घरमा जाऊ भनी बोलाइ ठाउँ ठाउँमा मादक पदार्थ खुवाएका थिए । शुक्लागण्डकी नगरपालिका ४ र ८ को सीमानामा पर्ने सेतीनदीमाथिको पुलबाट धकेलेर रामबहादुरको उनीहरुले हत्या गरे ।

रामबहादुरको हत्यापछि सुकबहादुर भारत गएका थिए भने मंगलबहादुर वैदेशिक रोजगारीका शिलशिलामा साउदी पुगेका थिए । मंगलबहादुर २०७२ मा नेपाल फर्केर चितवनतिर बस्दै आएका थिए ।

तपाईको प्रतिक्रिया