बन्दीपुरमा १ लाख २० हजार पर्यटक भित्रियाे

समाधान संवाददाता २०७६ पुष २५ गते १२:३२

कृष्ण न्यौपाने
दमौली

सन् २०१९ मा १ लाख २० हजार पर्यटकले तनहुँको पर्यटकीय नगरी बन्दीपुरको भ्रमण गरेका छन् । स्वदेशी तथा विदेशी गरी १ लाख २० हजार पर्यटकले बन्दीपुरको भ्रमण गरेको बन्दीपुर पर्यटन विकास समितिले जानकारी दिएको छ ।

बन्दीपुर भ्रमण गर्नेमध्ये ७५ प्रतिशत स्वदेशी र २५ प्रतिशत विदेशी पर्यटक रहेको समितिका अध्यक्ष वैश गुरुङले जानकारी दिए । उनका अनुसार यस अवधिमा ९० हजार स्वदेशी र ३० हजार विदेशी पर्यटकले बन्दीपुरको भ्रमण गरेका छन् । गत वर्ष पनि यही हाराहारीमा नै स्वदेशी तथा विदेशी पर्यटक बन्दीपुर पुगेको समितिले जनाएको छ । विसं २०७२ सालको भूकम्पपछि प्रत्येक वर्ष बन्दीपुर घुम्न आउने पर्यटकको संख्यामा वृद्धि भएको छ । ‘भूकम्प गएको केही समय बन्दीपुर सुनसान जस्तै बन्यो, पर्यटकको चाप निकै कम थियो,’ उनले भने, ‘अहिले बन्दीपुरमा पर्यटकको चाप राम्रो छ ।’ बन्दीपुरमा अमेरिका, थाइल्यान्ड, चीन, भारत, कोरिया र युरोपियन मुलुकका धेरै पर्यटक आउने गरेका छन् ।

अफसिजनमा बन्दीपुरमा चिनिया पर्यटक अत्याधिक रहने गरेका छन् । बास नबसेपनि भ्रमणको लागि मात्रै आउने पर्यटकमध्ये चिनियाँ पर्यटक बढी रहने गुरुङले जानकारी दिए । हाल बन्दीपुरमा दैनिक ५ सय भन्दा बढी पर्यटक भ्रमणका लागि आउने गरेका छन् । बन्दीपुरमा स्वदेशी तथा पर्यटकको आगमन बढ्न थालेपछि व्यवसायीले सुविधासम्पन्न होटल खोल्ने क्रम वृद्धि भएको छ । होटल व्यवसायीसमेत रहेका पर्यटन विकास समितिका अध्यक्ष गुरुङले हालैमात्र ८ करोडको लगानीमा होटल दरवार हिमालय सञ्चालनमा ल्याएका छन् ।

नेपाल भ्रमण वर्ष २०२० लाई लक्षित गरी हाल बन्दीपुरमा ९÷१० वटा होटल निर्माणाधीन अवस्थामा रहेको छ । नेपाल भ्रमण वर्ष २०२० मा बन्दीपुरमा २ लाख ५० हजार पर्यटक भित्र्याउने लक्ष्य राखिएको छ ।

बन्दीपुरमा हाल हिमालय दरवार, ग्रिनपार्क, फेवा, गाउँ घर, वल्र्ड ईन, बन्दीपुर प्यालेस, मगर भिजेल लगायत साना ठूला गरी ५७ वटा होटल तथा २२ वटा होमस्टे सञ्चालनमा छ । ती सबै होटलहरुमा एकै पटक १ हजार ३ सय देखि १ हजार ४ सय पर्यटकले रात बिताउन सक्नेछन् । बन्दीपुर घुम्न आउने पर्यटकलाई यहाँका पर्यटकीय एवं ऐतिहासिक स्थलको बारेमा जानकारी दिने गरिएको छ । बन्दीपुरमा ढुंगाले छापेको बाटोबाट सवारीसाधन जान निषेध गरिएको र पुराना घरहरु भएकोले पनि विदेशीहरु आकर्षित हुने गरेका छन् । बन्दीपुरबाट अन्नपूर्ण, माछापुच्छ्रे, धौलागिरि लगायतका हिमशृंखला देखिन्छ । भक्तपुरे शैलीमा निर्माण गरिएको घरहरु, टुँडिखेल, थानीमाई, तीनधारा, रानीबन, रामकोट, सुनखरी, खड्देवी मन्दिर, विन्ध्यवासिनी मन्दिर, महालक्ष्मी मन्दिर, सूचना केन्द्र लगायतका स्थलहरु यहाँ आउने पर्यटकको आकर्षणको केन्द्र बन्ने गरेको छ ।

कोलाहल, धुँवाधुलोबाट केही टाढा घुम्न जाने सोच बनाएकालाई बन्दीपुर उत्कृष्ट गन्तव्यको रुपमा विकास भइरहेको छ । सदरमुकाम दमौलीदेखि १८ किलोमिटर डुम्रे हुँदै ८ किलोमिटरको उकालो यात्रा तय गरेपछि बन्दीपुर पुगिन्छ । जहाँबाट मनोरम हिमशृंखला, पहाड, टाकुरा अवलोकन गर्न सकिन्छ । प्राकृतिक सुन्दरता बोकेको बन्दीपुरबाट अन्नपूर्ण, माछापुच्छ«े, धौलागिरि लगायतका हिमशृंखला देखिने भएकाले पर्यटक रमाउने गर्दछन् ।

बन्दीपुर घुम्न निम्तो
नेपाल भ्रमण वर्ष २०२० लाई लक्षित गरी बन्दीपुर गाउँपालिका, पर्यटन विकास समिति, क्षेत्रीय होटल संघले बन्दीपुर घुम्न निम्तो दिन देशका प्रमुख सहरमा कार्यक्रम गर्ने योजना बनाएको छ । नेपाल भ्रमण वर्ष २०२० मा उत्कृष्ट पर्यटकीय गन्तव्यको रुपमा विकास गर्ने योजना सहित देशका प्रमुख सहरमा माघ महिनामा कार्यक्रम गरी बन्दीपुर घुम्न निम्तो दिइने गाउँपालिकाका अध्यक्ष पूर्णसिं थापाले जानकारी दिए ।

तपाईको प्रतिक्रिया