अजीतलाई बन्दीपुर दौडको उपाधि

समाधान संवाददाता २०७६ माघ ३ गते १४:०१

कृष्ण न्यौपाने
दमौली

बन्दीपुर गाउँपालिकाले बुधबार आयोजना गरेको दौड प्रतियोगिताको उपाधि काठमाडौंका अजीतकुमार यादवले जितेका छन् । बन्दीपुर पर्यटन प्रवद्र्धन गर्ने उद्देश्यसहित आयोजना गरिएको प्रतियोगितामा खुलातर्फको उपाधि यादवले जितेका हुन् ।

बन्दीपुरको डुम्रे बजारदेखि गाउँपालिका कार्यालयसम्म ८ किमी दूरी यादवले ३८ मिनेट ५३ सेकेन्डमा पार गरेका थिए । प्रतियोगितामा ओेखलढुंगाका अनील कार्की द्वितीय भए । उनले उक्त दूरी ३९ मिनेट १६ सेकेन्डमा पूरा गरे । प्रतियोगितामा प्रथम र द्वितीय हुने धावकले क्रमश ३० हजार र १५ हजार प्राप्त गरे ।

आन्तरिकतर्फको दौडमा बन्दीपुर १ का चन्द्रकुमार सुनार उक्त उक्त दूरी ४४ मिनेट ५१ मिनेटमा पार गरी प्रथम भए । बन्दीपुर २ का रविन गुरुङले ४६ मिनेट ३७ सेकेन्डमा पूरा गरी द्वितीय भए । खुला र आन्तरिक गरी प्रतियोगितामा ३० जान धावक सहभागी थिए ।

विजेतालाई गण्डकी प्रदेशका उद्योग, पर्यटन, वन तथा वातावरणमन्त्री विकास लम्साल र गाउँपालिका अध्यक्ष पूर्णसिं थापाले पुरस्कार वितरण गरे । मन्त्री लम्सालले खेलकुदको माध्यमबाट पर्यटन प्रवद्र्धनमा महत्वपूर्ण योगदान पुग्ने बताए । पर्यटनबाट समृद्धि सम्भव रहेको चर्चा गर्दै मन्त्री लम्सालले पर्यटकीय क्षेत्रको विकासका लागि सरकारले सहयोग गर्ने बताए ।

नेपाल भ्रमण वर्ष २०२० का अवसरमा बन्दीपुरको पर्यटन प्रवद्र्धन गर्ने उद्देश्यसहित दौड आयोजना गरिएको गाउँपालिकाका अध्यक्ष थापाले बताए । गाउँपालिकाले सोही अवसरमा एकल पुरुषलाई सिरकसमेत वितरण गरेको छ । गत वर्ष एकल महिलालाई सिरक वितरण गरेको गाउँपालिकाले यो पटक ७० वर्ष उमेर कटेका ६ सय जना एकल पुरुषलाई सिरक वितरण गरेको हो ।

बन्दीपुरलाई पर्यटनको माध्यमबाट परिचित गराउन गाउँपालिकाले विभिन्न कार्यक्रम आयोजना गरिरहेको छ । गाउँपालिकाले गत वर्ष बन्दीपुर गाउँपालिका ४ विमलनगरस्थित सिद्धगुफाभित्र टेबलटेनिस र कवितावाचन प्रतियोगिता गरेको थियो ।

तपाईको प्रतिक्रिया