२ चिनियाँलाई कोरोना थिएनः प्रदेश स्वास्थ्य निर्देशनालय

समाधान संवाददाता २०७६ माघ २३ गते १३:२७

समाधान संवाददाता
पोखरा

करिब १ हप्ताअघि सामाजिक सन्जाल र केही सञ्चारमाध्यममा खबर फैलियो, ‘पोखरा आएका २ चिनियाँ नागरिकलाई कोरोना भएको आशंका । मणिपाल अस्पताल रेफर ।’ कोरोना भाइरसले त्रस्त सर्वसाधारण त्यस खबरले झन् आक्रान्त बने । जनमानसमा त्रास त्यतिबेला झन् बढ्यो, जतिबेला आशंका गरिएका ती चिनियाँ सम्पर्कबाहिर भए ।

गण्डकी प्रदेश स्वास्थ्य निर्देशनालयले ती २ चिनियाँलाई कोरोना भाइरस नभएको जनाएको छ । निर्देशनालयले अहिले उनीहरु सम्पर्कमा नभए पनि उनीहरुलाई कोरोना नभएको प्रष्ट गरेको हो । ती २ चिनियाँ पहिले गण्डकी मेडिकल कलेज र पछि मणिपालमा कोरोनाबारे सोधपुछका लागिमात्र गएको निर्देशनालयले जनाएको छ।

‘उनीहरु हाम्रो सम्पर्कमा आएका बेला आफैैं यहाँ कोरोना भाइरस चेक हुन्छ कि हुँदैन भनेर सोधेका थिए,’ निर्देशनालय निर्देशक डा. विनोद विन्दु शर्माले समाधानसँग भने, ‘मणिपालमा ल्याब टेस्ट नहुने भएपछि उनीहरु फर्किएका हुन् ।’ उनले चिनियाँ नागरिकले कोरोना भाइरसबारे सोधपुछ गर्न आएपछि प्रदेशको इमेर्जेन्सी टिमले उनीहरुको पासपोर्ट राखेको जनाए । त्यसपछि चिनियाँ सम्पर्कबाहिर गएका हुन् ।

डा. शर्माले उनीहरुलाई कोरोना भाइरस नभएको बताए । ‘कोरोना भाइरस भएकोचाहिँ डेफिनेट्ली होइन । तर, उनीहरु कोरोनाबारे चासो लिएर आएका हुन्,’ उनले भने । शर्माले २ चिनियाको पासपोर्ट आफूहरुसँग सुरक्षित भएको उल्लेख गरे ।

तपाईको प्रतिक्रिया