१४ औं पोखरा म्याराथनः टोल टोलबाट सहभागी हुन मेयर जिसीको आग्रह

समाधान संवाददाता २०७६ माघ २९ गते १३:५१

समाधान संवाददाता
पोखरा

पोखराका मेयर मानबहादुर जिसीले फागुन ३ हुने पोखरा अन्तर्राष्ट्रिय म्याराथनमा टोल टोलबाट सहभागी हुन पोखरेलीलाई आह्वान गरेका छन् । पोखरा महानगरपालिकाका विभिन्न वडाका अध्यक्षलाई गर्दै मेयर जिसीले पोखरा म्याराथन सफल बनाउन नगरवासी एकजुट हुनुपर्नेमा जोड दिए । ‘पोखरा म्याराथन सफल बनाउन टोल टोल र गल्ली गल्लीबाट पोखरा म्याराथनमा सहभागी हुन म सबैलाई आग्रह गर्छु,’ उनले भने, ‘स्वास्थ्यसँगै पोखराको प्रवद्र्धन गर्न म्याराथनले महत्वपूर्ण भूमिका खेल्नेछ ।’

म्याराथन आयोजक संस्था भूतपूर्व खेलाडी मञ्चका अध्यक्ष तेज गुरुङले सबैको साथ र सहयोगले पोखरा म्याराथनले सफलता पाउने विश्वास व्यक्त गरे । उनले पोखरा म्याराथनमा विशिष्ट व्यक्तित्वको सहभागिताले अन्तर्राष्ट्रिय रुपमा स्थापित हुँदै गएको बताए । पोखरा म्याराथनले नेपाल भ्रमण वर्षलाई सफल पार्न अहं भूमिका खेल्ने बताए ।

युनेस्कोका पूर्व अध्यक्ष पनि म्याराथनमा
युनेस्कोका पूर्व अध्यक्ष डेभिडसन हेप्वर्न १४ औं पोखरा अन्तर्राष्ट्रिय म्याराथनमा सहभागी हुन मंगलबार पोखरा आइपुगेका छन् । पोखरा म्याराथनमार्फत् विश्व शान्तिको कामना गर्न पूर्व अध्यक्ष डेभिडसन पोखरा आएका हुन् । पोखरा विमानस्थलमा मञ्चका अध्यक्ष तेज गुरुङ लगायतले उनलाई स्वागत गरेका थिए ।

उनले पोखरा म्याराथनमा सहभागी हुनमात्रै नभई सुन्दर सहर पोखरा आउन पाउनु आफ्नालागि गौरवको विषय भएको बताए । म्याराथनमा पूर्व अध्यक्ष डेभिडसनले शान्तिको कामना गर्दै पिस टर्च बाल्ने र आफ्नो सहभागिता जनाउने छन् ।

पोखरा टिभीबाट प्रत्यक्ष प्रसारण
पोखरा म्याराथनको पोखरा टिभीले प्रत्यक्ष प्रसारण गर्ने भएको छ । म्यारथनको प्रत्यक्ष प्रसारण गर्न मञ्चका अध्यक्ष तेज गुरुङ र पोखरा टिभीका अध्यक्ष मनोज गुरुङले सहमति पत्रमा हस्ताक्षर गरेका छन् । सम्झौतापछि कुरा गर्दै पोखरा टिभीका अध्यक्ष गुरुङले पोखराको गौरवको रुपमा रहेको पोखरा म्याराथनलाई आफ्नो टेलिभिजनमार्फत् प्रसारण गर्न पाउनु सुखद रहेको बताए । उनले स्थानीय तहमा हुने खेल गतिविधिलाई व्यावसायिक रुपमा भन्दा पनि सहयोगी हातका रुपमा अघि बढाएको उल्लेख गरे ।

तपाईको प्रतिक्रिया