कोरियामा रहेका अमेरिकी सैनिकमा पनि देखियो कोभिड-१९

समाधान संवाददाता २०७६ फागुन १४ गते ११:४८

एजेन्सी

दक्षिण कोरियास्थित क्यारोल क्याम्पमा रहेका एक अमेरिकी सेनामा कोभिड-१९ को संक्रमण देखिएको छ। बुधबार २३ वर्षका ती सैनिकलाई जाँचपछि कोरोनाभाइरस रहेको पुष्टि भएको हो। 

संक्रमित सैनिकलाई अहिले ‘सेल्फ क्वारेन्टाइन’ मा राखिएको छ।

२८ हजार अमेरिकी सेना रहेको क्यारोल क्याम्प कोभिड-१९ को संक्रमण बढी रहेको थेगु शहरबाट ३० किलोमिटर उत्तरमा छ।

क्याम्पमा रहेका सैनिकमा कोभिड-१९ संक्रमण देखिएपछि अहिले बाँकी सैनिकलाई पनि जाँच गरिएको छ। त्यसको नतिजा भने बाहिर आएको छैन।

बुधबारसम्म दक्षिण कोरियामा कोभिड-१९का कारण ११ जनाको मृत्यु भएको छ भने ११ सय मानिस संक्रमित छन्।

चीनको वुहानबाट फैलिएको कोभिड-१९ अहिले यूरोप, मध्यपूर्व र एसियामा फैलिएको छ।

चीनमा मात्र कोभिड-१९ बाट २७ सयको मृत्यु भइसकेको छ भने ७८ हजार मानिस संक्रमित छन्।


तपाईको प्रतिक्रिया