समाधान संवाददाता
पोखरा

स्याङ्जाको बिरुवा गाउँपालिका १ बिरुवा बजारमा १४ औं बिरुवा बजार महोत्सव हुने भएको छ । बालकन्या युवा क्लब, समाज कल्याण आमा समूह, बिरुवा बजार व्यवस्थापन समिति र बिरुवा उद्योग वाणिज्य संघको आयोजनामा महोत्सव हुने भएको हो ।

फागु पूर्णिमाको अवसरमा हुने महोत्सव जिल्लाकै पुरानो मेलाका रुपमा परिचित छ । ‘स्वास्थ्यका लागि खेलकुद, राष्ट्रका लागि खेलकुद, विकास अनुशासन गतिशीलता, हामी बिरुवावासी युवाको प्रतिबद्धता’ भन्ने नाराका साथ हुने महोत्सव फागुन २६ देखि ३० गतेसम्म चल्नेछ । महोत्सवमा चर्चित कलाकारको प्रस्तुति, स्थानीय सांस्कृतिक प्रस्तुति, पुरुष भलिबल प्रतियोगिता, नृत्य प्रतियोगिता, रत्यौली प्रतियोगिता, छेलो हान्ने प्रतियोगिता, रस्साकस्सी प्रतियोगिता लगायतका कार्यक्रम हुने संयोजक अब्बु मियाँले जानकारी दिए ।

महोत्सवमा हुने भलिबल प्रतियोगितातर्फ प्रथम, द्वितीय र तृतीय हुने टिमले क्रमश ५५ हजार ५ सय ५५, ३३ हजार ३ सय ३३ र २२ हजार २ सय २२ सहित सिल्ड, मेडल तथा प्रमाणपत्र प्राप्त गर्ने छन् । स्थानीय कला संस्कृतिको संरक्षण र पर्यटन प्रवद्र्धनका लागि आयोजित महोत्सवलाई सघाउन क्लबका अध्यक्ष बीरवल खड्काले आग्रह गरेका छन् ।