सांसदको मुख्य काम कानुन निर्माण गर्ने हो । तर नेपालका सांसदहरु कर्मचारीतन्त्रबाट रेडिमेड आएको कानुन पास गर्ने वा पार्टीका केही मुखिया नेताहरुले भने बमोजिमको कानुन पास गर्न टेबुल ठोक्ने काममा मात्रै सीमित रहेको आरोप लाग्दै आएको छ । त्यसैले त थुप्रै सांसदहरु संसदबाट कुनकुन कानुन बनेर र मैले कहिले कहिले टेबुल ठोकेर कानुन पास गरें भन्ने जवाफ पनि दिन सक्दैनन् । त्यस्तो अवस्थामा केस्राकेस्रा पढेर विधेयकमा थपघट के गर्ने उनीहरुले ? झन् गैरसरकारी विधेयक दर्ताको हिम्मत त विरलै उदाहरण हुने भइहाले । नेकपाका सांसद शेरबहादुर तामाङले भने गाँजाखेतीलाई वैधता दिनुपर्ने प्रस्तावसहितको निजी विधेयक सोमबार दर्ता गरेका छन् । २०६२÷६३ सालयता विधायकले गैरसरकारी विधेयक दर्ता गरेको यो पहिलोपटक हो । नत्र सधैं सरकारले नै विधेयक ल्याउँछ र सांसद टेबुल ठोकेर पास गर्छन् । २०४८ सालयताको संसदीय अभ्यासमा तामाङले भन्दा अघि केवल सुवास नेम्बाङले बार काउन्सिल विधेयक र महेश आचार्यले मानव अधिकार आयोग सम्बन्धी गैरसरकारी विधेयक दर्ता गराएका थिए ।

गाँजा खेतीलाई प्रतिबन्ध मुक्त गराउन मागसहित यसअघि ४६ सांसदले गाँजा खेतीलाई कानुनी मान्यताको माग गर्दै संसदमा सार्वजनिक महत्वको प्रस्ताव दर्ता गरेका थिए, जसको अगुवाइ नेकपा सांसद विरोध खतिवडाले गरेका छन् । अहिलेसम्मको कानुनले गाँजालाई नेपालमा लागु औषध मानिन्छ । वर्षभरि लागुऔषध कारोबार र प्रयोक्ताका नाममा मुलुकभर पक्राउ पर्ने हजार १२ सयजनामध्ये ८७ प्रतिशतजना गाँजासम्बद्ध हुन्छन् । २०३३ सालअघिसम्म नेपालमा गाँजा खुला नै थियो । गाँजा खान आउने हिप्पीहरुकै कारण नेपालमा पर्यटन फस्टाउँदै आएको पनि हो । तर त्यही नै नेपालमा गाँजा प्रतिबन्ध लाग्नुको कारण बन्यो । अमेरिकी दबाबमा नेपालले लागु औषध नियन्त्रण ऐन २०३३ ल्यायो र गाँजा खेती र यसको प्रयोग तथा कारोबार लगायत सबैमा प्रतिबन्ध लगायो । सन् १९६१ मा संयुक्त राष्ट्रसंघको नार्काेटिक्स महासन्धिमा पनि नेपालले हस्ताक्षर ग¥यो । कैयौं मुलुकले गाँजामाथि प्रतिबन्ध नलगाउने सर्तसमेत राखी महासन्धिमा हस्ताक्षर गरे भने नेपालले बिनासर्त । अहिले प्रतिनिधि सभामा दर्ता भएको पूर्वकानुनमन्त्रीसमेत रहेका शेरबहादुर तामाङको विधेयकले पुरानो लागु औषध नियन्त्रण ऐनका बुँदा संशोधन गरी गाँजा खुला गर्‍यो भने मात्रै पनि काम पूरा हुँदैन । राष्ट्रसंघको नार्काेटिक्स बोर्डमा नेपालले निवेदन गरी अरु लागुऔषध प्रतिबन्धै गराइराख्ने गाँजा फुकुवा गर्ने अनुमति लिनुपर्छ । सरकारले चाहना नै राख्यो दुवै काम असम्भव हुँदै ।

गाँजा किन फुकुवा गर्ने भन्ने बहस व्यापक छ । पहिलो तसले हामीलाई प्रतिबन्ध लगाउन उकासेको थियो, त्यो देश अमेरिका आफैंले गाँजालाई खुला गरिसक्यो । यस्तो पंक्तिमा थुप्रै मुलुक छन् । गाँजामात्रै किन धेरै खाँदा जुनसुकै खाद्यपदार्थ पनि मानिसका लागि विष हुन्छ । गाँजा औषधीय गुणसहितको वनस्पति हो, जसको खेती गरी औषधी उत्पादन गर्न भारतमा प्रयास सुरु भइसक्यो । नेपालको हावापानी गाँजाका लागि अति उपयुक्त मानिएको छ । एक गाँजाबाट दर्जनौं रोगको उपचारक औषधी बनाउन सकिन्छ भने अर्काे यसको डाँठ र रेशा पनि कपडा र फर्निचर लगायत वस्तु बनाउन प्रयोग गर्न सकिन्छ । गुणैगुणले भरिएको गुणकारी वनस्पतिको खेती गर्दा किसानले पनि लाखौं आम्दानी गर्न सक्छन् । मुलुकको अर्थतन्त्रमै यसले योगदान पु¥याउन सक्छ भन्ने विज्ञहरुले बताउँदै आएका छन् । यस कुरालाई ख्याल गरी तामाङले पेस गरेको विधेयक पारित गर्नु मुलुकका लागि हितकर हुनेछ ।