१८ औं आहा रारा गोल्ड कपः संकटासँग आर्मीको सजिलो जित

समाधान संवाददाता २०७६ फागुन २८ गते १२:३१

समाधान संवाददाता
पोखरा

१८ औं आहा रारा गोल्डकप अन्तिम क्वाटर फाइनलको खेलमा संकटा फुटबल क्लबलाई ३–० गोलले हराउँदै त्रिभुवन आर्मी क्लब सेमिफाइलनमा प्रवेश गरेको छ ।

त्रिभुवन आर्मी क्लबका लागि खेलको १५ औं मिनेटमा सुदिल राइले डि बक्स भित्रबाट प्रहार गरेको बलले जाली चुमेको थियो । खेलको ७१ औं मिनेटमा ११ याडभित्रबाट प्रहार गरेको ग्रास बल गोलमा परिणत भयो । खेलको ७५ औं मिनेटमा विवेक विष्टले डि बक्स भित्रबाट प्रहार गरेको बलले जाली चुमेको थियो । विष्ट खेलको ६७ औं मिनेटमा मैदान प्रवेश गरेका थिए । मैदान प्रवेश गरेका विष्टले धेरै बलको फिनिसिङ राम्रो गरेसँगै १० मिनेटभित्रै गोल गर्न सफल भए । खेलको पहिलो हाफमा त्रिभुवन आर्मीका खेलाडीले राम्रो खेल प्रदर्शन गर्न सकेनन् ।

खेलको ३० औं मिनेटमा सुमन अर्यालको पासमा नवयुग श्रेष्ठले प्रहार गरेको बल क्रसबारबाट बाहिरियो । खेलको ५५ औं मिनेटमा नवयुग श्रेष्ठको पासमा सुदिल राइले प्रहार गरेको बलले जाली चुम्न सकेन ।

संकटा क्लबका लागि खेलको ७ औं मिनेटमा रोशन पहारीको पासमा मसुकी पियरेले प्रहार गरेको बल गोल हुन सकेन । खेलको ४१ औं मिनेटमा ड्याडी आम्बाले प्रहार गरेको बल क्रसबारबाट बाहिरिएको थियो । खेल अवधिमा धेरै समय त्रिभुवन आर्मी क्लबका खेलाडीले बललाई नियन्त्रमा लिएका थिए ।

त्रिभुवन आर्मी क्लबका कोच नवीन न्यौपानेले खेलको सुरुमै सुदिल राई, सन्तोस तामाङ र विकास तामाङले पहेँलो कार्ड पाएका कारण मनोबल घटेको बताए । हाफपछि छिटो खेल्ने खेलाडीलाई मैदानमा लगेर उत्कृष्ट नतिजा निकाल्न सफल भएको न्यौपानेको भनाइ छ । न्यौपानेले आहा रारा गोल्डकपमा उपाधि उचाल्ने अवसर मिलेको भन्दै अवसर सदुपयोग गर्ने बताए ।

संकटा फुटबल क्लबका कोच सलबइन खाडिजीले सुरुको १५ मिनेटमा राम्रो खेल प्रदर्शन गरेको पछिल्लो समयमा खेल कमजोर हुँदै गएको बताए । खेलाडीले पाएको अवसरको प्रयोग गर्न नसक्दा पनि खेलबाट बाहिरन परेको उनले बताए । हाफपछिको खेलमा संकटाको कमजोरीलाई आर्मीै क्लबले प्रयोग गर्न सकेको बताए ।

पुलिस र थ्री स्टारको ७ औं भिडन्त
यसअघि पनि आहा रारा गोल्डकपमा नेपाल पुलिस फुटबल क्लब र थ्री स्टार फुटबल क्लबबीच ६ पटकसम्म भिडन्त भएको छ । तेस्रो आहा रारा गोल्डकपमा नेपाल पुलिस क्लबले २–१ गोलअन्तरमा थ्री स्टारलाई हराउँदै पुलिस क्लब फाइनलमा प्रवेश गरेको थियो । छंैटौ आहा रारा गोल्डकपमा पुलिस क्लबले १–० गोलले हराउँदै थ्री स्टार फुटबल क्लब क्वाटरफाइनलबाट बाहिरिएको थियो ।

सातौं आहा रारामा पुलिस क्लबले २–० गोलको अन्तरमा क्वाटर फाइनलबाट थ्री स्टार क्लब बाहिरियो । नवौं आहा रारा गोल्डकपमा सेमिफाइनलको खेलमा थ्री स्टार क्लबसँग १–० अन्तर पार्दै पुलिस क्लब बाहिरिएको थियो । १३ औं मा थ्री स्टार फुटबल क्लबले ०–१ गोलको अन्तर पार्दै पुलिस क्लब सेमिफाइनलबाट बाहिरिएको थियो । १६ औं मा नेपाल पुलिस क्लबले १–० को अन्तरमा थ्री स्टारलाई हराउँदै उपाधि उचाल्न सफल भएको थियो ।

तपाईको प्रतिक्रिया