समाधान संवाददाता

कोरोना भाइरसको महामारी विरुद्ध लडिरहेको गण्डकी सरकारले थोरै साधान र श्रोत उपलब्ध भए पनि प्रभावकारी ढंगले प्रयोग गर्ने रणनीति लिएको छ । उसले सबै जिल्ला अस्पताललाई कोरोनाका विरुद्धको लडाईमा तयार रहन निर्देशन दिदैं तत्कालका लागि केही पिपिई सामाग्री र नगद प्रदान गरेको छ ।

गण्डकी प्रदेशको कोराना रोकनाथ, नियन्त्रण र उपचार समन्वय समितिका संयोजक एवं प्रदेश सरकारका आर्थिक मन्त्री किरण गुरुङले बताए अनुसार तत्कालका लागि प्रत्येक जिल्ला अस्पतालमा ५–५ थान पिपिई र १० लाख नगद पठाइएको छ । पिपिई भनेको विरामीको उपचार गर्न खटिने स्वास्थ्यकर्मीले लगाउने सुरक्षित पोशाक हो ।

‘अहिले देशै भर पिपिईको अभाव छ, त्यसैले सबै जिल्लामा ५–्५ थानका दरले पठाएका छौं । चिनबाट आउना साथ थप पठाउछौं ।’ संयोजक गुरुङले भने–प्रारम्भिक तयारीका लागि सबै जिल्ला अस्पताललाई १०–१० नगद पनि उपलब्ध गराएका छौं ।

प्रदेशमा कोरोना विरुद्धको लडाईमा पैसाको अभाव हुन नदिने गरी तयारी गरिएको पनि उनलले बताए । यसका लागि मन्त्री परिषदको बैठकले कोष स्थापना गरेको छ । सो कोष सञ्चालक समितिको संयोजक गण्डकी प्रदेशका सामाजिक विकास मन्त्री नरदेवी पुनलाई तोकेको छ ।

प्रदेश सरकारले सबै जिल्ला अस्पताललाई कोरोना भाइरसका विरामीको उपचार गर्ने अस्पतालका रुपमा प्रयोग गर्ने निर्णय गरेको छ । सो अनुसार तयारी थाल्न निर्देशन दिईसकेको छ ।