समाधान संवाददाता

गण्डकी प्रदेशको सबै भन्दा ठुलो अस्पताल पश्चिमााञ्चल क्षेत्रीय अस्पताल (हालको पोखरा स्वास्थ्य विज्ञान प्रतिष्ठान) मा यसअघि लापरवाहीका घटना त घटिरहेकै हुन्थे । तर अहिले राज्यका सबै निकायको ध्यान यही अस्पताल तर्फ गैरहेको बेलामा पनि लापरवाही गर्ने क्रम जारी छ । सोमबार यस्तै एउटा गम्भीर लापरवाही गरिएको खबर प्राप्त भएको छ ।

गण्डकी प्रदेश सरकारले यही अस्पताललाई कोरोनाको उपचार गर्ने पहिलो अस्पतालका रुपमा विकास गर्ने निर्णय गरेको छ । यही अस्पतालमा कोरोना संक्रमित आशंकाका विरामीको स्वाब संकलन गरिन्छ । सरकारले विदेशबाट आएका सबै मानिसलाई क्वारेन्टाइनमाा राख्न र कोरोनको सामान्य लक्षण देखिएका विरामीलाई स्वाबको रिपोर्ट नआएसम्म आइसोलेशनमा राखेर उपचार गर्न निर्देशन दिदैं आएको छ ।

सोमबार रुघाखोकी लागेका, ज्वरो आएको र छातीमा संक्रमण भएका एक विरामी उपचारार्थ पोखरा स्वास्थ्य विज्ञान प्रतिष्ठानमा गए । उनको ज्वरो १०३ थियो भने छातीमा निमोनिया थियो । रुघा खोकी पनि लागेको थियो । सोमबारै उनको स्वाब संकलन गरेर पठाइएको छ । शसस्त्र प्रहरीमा तालिमरत उनको ट्राभल हिस्ट्री नभएको भन्दै घर पठाएको अस्पताल श्रोतले जानकारी दियो । उनलाई ब्यारेक भित्रै आइसोलेशनमा राख्छौं भन्दै लगिएको हो ।

ती विरामीको रगतमा डब्लुबिसी १८ हजार पुगेको थियो । सामान्यतया डब्लुबिसी १२ हजार भन्दा तलै हुनुपर्छ । चिकित्सकहरुका अनुसार यति उच्च डब्लुबिसी भएको विरामीलाई भर्ना गरेरै इन्जेक्शनबाट एन्टिबायोटिक चढाउनु पर्छ । तर स्वाब संकलन गरेर प्रहरीको ब्यारेक मै पठाइएको छ । ‘कम से कम परिक्षणको रिपोर्ट नआउन्जेल सरकारी आइसोलेशन मै राख्नु पर्दथ्यो ।’ ती चिकित्सकले समाधानन्युजसंग भने–ट्राभल हिस्ट्री नभएपनि ८० प्रतिशत लक्षण कोरोना भाइरस संक्रमितसंग मिल्दो जुल्दो छ ।’

सोमबार ती प्रहरी सहित चार जनाको स्वाब संकलन गरिएको छ । ती मध्ये तीन जना पोखराकै हुन । उनीहरु सबैलाई आ आफ्नै घर पठाइएको छ भने परिवार सहित भारतबाट आएका तनहुँका बासिन्दा अस्पताल परिसर मै अलपत्र थिए ।

ल्याबमा हाहाकार
सोमबार दिउसो समाधान कर्मी पोखरा स्वास्थ्य विज्ञान प्रतिष्ठानमा पुग्दा एक जना ल्याब टेक्निशियन बढो बेचैन थिए । उनी आफु भन्दा उपल्ला तहका कर्मचारीलाई सोध्दै थिए– अब कहाँ बस्ने ? कोठामा श्रीमती बच्चा बच्ची छन । यिनीहरुले मार्ने भए ।

उनी तिनै ल्याब टेक्निशियन हुन जसले तिनै प्रहरीको रगतको स्याम्पल लिएका थिए । स्याम्पल लिँदा उनी सामान्य पोशाकमा थिए । उनको रगतको रिपोर्ट हेरेपछि ल्याबमा कार्यरत कर्मचारी त्रसित बनेका छन् ।

यदी उहाँ कोरोना भाइरस संक्रमित रहेछ भने त मलाई मात्र होइन घर परिवारलाई पनि सर्छ भन्दै उनले छुट्टै बस्ने व्यवस्था गर्न माग गरिरहेका थिए । तर गण्डकी प्रदेशमा स्वास्थ्यकर्मीहरुका लागि क्वारेन्टाइन वा आइशोलेशन वार्ड बनाइएको छैन ।