धार्मिक सभामा गएर पोखरा फर्केका मुसलमानको कोरोना परीक्षण हुँदै

समाधान संवाददाता, पोखरा

भारतीय राजधानी नयाँदिल्लीको निजामुद्दिन मर्कज (बंगलेवाली मस्जिद) मा बितेको महिना सम्पन्न तबलिगी जमातको इज्तिमामा पोखराबाट समेत २ जना गएको पाइएको छ ।

उक्त सम्मेलनमा संलग्नमध्ये कतिपयमा कोरोना भाइरसको संक्रमण देखिएको हुँदा पोखराबाट गएकाहरुको पनि परीक्षण हुन लागेको छ ।

गण्डकी प्रदेशका मुख्यमन्त्री पृथ्वीसुब्बा गुरुङले शनिबार आफ्नो फेसबुक लाइभबाट उक्त जानकारी दिएका हुन् । ‘मैले पोखरा १३ का वडाध्यक्ष दर्शन लामासँग कुराकानी गरें, मियापाटन जहाँ मुस्लिम दाजुभाइहरु बस्नुहुन्छ, उहाँले २ जनाको नाम दिनुभयो, एकजना घर सप्तरी र अहिले सिद्धार्थ चोकमा काठको व्यापार बस्ने, अर्काे सायद मियापाटनको हुनुहुँदोरहेछ, उहाँको नाम र नम्बर कास्कीको सीडीओ साब र एसपीलाई पठाएर स्वाब संकलन गर्ने भन्या छ,’ मुख्यमन्त्रीले भने, ‘आरडीटी टेस्ट आज (शनिबार) भएछ ।’

सिद्धार्थचोकमा बस्नेको आरडीटी परीक्षण नेगेटिभ आइसकेको जानकारी उनले दिए । मुख्यमन्त्री गुरुङका अनुसार आइतबार दुवैजना र उनका परिवारहरुको पीसीआर परीक्षण नै गरिँदैछ । ‘उहाँहरुसँगको कन्टयाक्ट ट्रेसिङ गरेर कन्ट्याक्टमा आएकाहरुको पनि टेस्ट गरेर उदयपुरको घटनाजस्तो, दिल्लीको घटना जस्तो, लखनऊको घटनाजस्तो नहोस् भनेर सचेत भाछौं,’ उनले भने ।

उदयपुरमा बसेका १ नेपालीसहित ११ भारतीय नागरिक गरी १२ जनामा शुक्रबार कोरोना संक्रमण भेटिएको थियो । उनीहरु भारतमा भएको मुस्लिम धार्मिक सभा (तबलिगी जमातको इज्तिमा)मा सहभागी भएर फर्किएकाहरु थिए ।

उनीहरुलाई उपचारका लागि कोसी अस्पतालमा भर्ना गरिसकिएको छ । शनिबार उदयपुरमा अरु संक्रमित भेटिएका छन् । शनिबार फेरि उदयपुरमा १ जना संक्रमित थपिएसँगै नेपालमा संक्रमितको संख्या ३१ पुगेको छ ।