मादीका घरघरमा पुगेर बिरामी जाँच

समाधान संवाददाता २०७७ वैशाख १३ गते १५:५२

पोखरा

कास्कीको मादी गाउँपालिका वडा ५ मा लकडाउनबीच पनि स्वास्थ्यकर्मीसहितको टोलीले घरघरमा बिरामीको स्वास्थ्य जाँच गरेको छ । सो क्रममा निःशुल्क औषधीवितरण समेत गरियो ।


चितेपानी ट्रष्टको आयोजना तथा मादी वडा ५ समितिको विपद् व्यवस्थापन सहयोगअन्तर्गत सो कार्यक्रम गरिएको जनप्रतिनिधि सरोज केसीले जानकारी दिए ।


लकडाउन कारण अस्पतालसम्म पुग्न नपाई औषधि सेवन गर्न नपाएका, असहाय, अशक्त र नियमित उपचारबाट वञ्चित सुन्पँदेली, चितेपानी, देउमाणी टोलका करिब ५६ जना बिरामीलाई सेवा दिइएको हो । लकडाउनपछि फरक शैलीमा दिइएको सो सेवा अति नै उपयोगी भएको सहभागीले प्रतिक्रिया दिए ।
माँदी ५ का सबै नागरिकमा लक्षित सो कार्यक्रम पहिलो चरणमा सकिएको र तत्कालै अन्य टोलमा समेत बिरामी कति छन् भन्नेबारे डाटा संकलन गरी दोस्रो चरणको कार्यक्रम लिएर पुग्ने चितेपानी ट्रष्टका अध्यक्ष समाजसेवी एवं शिक्षासेवी टीकाराम सापकोटा बताए ।


घुम्ती शिविर संचालनमा पोखरा स्वास्थ्य विज्ञान प्रतिष्ठानका वरिष्ठ डा. राजेश अधिकारी, वरिष्ठ डा. पद्म ढुंगाना, फार्मासिष्ट गणेश बराल लगायतले सेवा दिएका हुन् ।


डा. अधिकारीले लकडाउनमा पनि गाउँमै पुगेर सेवा दिन पाउँदा खुशी लागेको बताए । उनका अनुसार नियमित सेवा लिने सबैलाई औषधिसहित सेवा दिएको र पहिलो चरणको परीक्षणमा कुनै जटिल समस्या नरहेको जनाए ।
घुम्ती शिविरमा विभिन्न दल, सामुदायिक प्रहरी कालिका र समाजसेवीको उपस्थिति थियो ।

तपाईको प्रतिक्रिया