पाेखरामा प्रसूति सेवाका लागि निशुल्क एम्बुलेन्स

समाधान संवाददाता २०७७ वैशाख १५ गते १३:४८

पोखरा

कोरोना भाइरसका कारण प्रसूति सेवा लिन समस्या नहोस भनेर पोखरा महानगरले निशुल्क एम्बुलेन्स व्यवस्था गर्ने निर्णय गरेको छ ।

पोखरा महानगरपालिकाका उपप्रमुख मञ्जुदेवी गुरुङको संयोजकत्वमा रहेको कोरोना संक्रमण नियन्त्रण मूल समितिको सोमबार बसेको बैठकले
प्रसूति सेवाका लागि अस्पताल जानुपर्ने गर्भवती महिलालाई निशुल्क एम्बुलेन्स सेवाको व्यवस्था गर्ने निर्णय गरेको हो ।

कुनै पनि महिलाले प्रसूति सेवा समयमै नपाएर समस्या भोग्न नपरोस भन्ने उद्देश्यले एम्बुलेन्स सेवा उपलब्ध गराउने निर्णय गरेको उपप्रमुख गुरुङले बताइन् ।

लकडाउनका कारण सवारी साधनको अभावमा प्रसूति सेवाका लागि अस्पताल जान समस्या हुने र ज्यानै जानसक्ने अवस्था आउने भएकाले महिलाहरुको समस्यालाई ध्यानमा राखेर यो निर्णय गरेका हौं, उनले भनिन् । महानगरले प्रसूति सेवा लिन अस्पताल जानुपर्ने अवस्थाका महिलाका लागि ४ वटा एम्बुलेन्स तयारी अवस्थामा राखेको पोखरा महानगर स्वास्थ्य महाशाखा प्रमुख हेमन्त शर्माले बताए ।

एम्बुलेन्सका लागि पोखरा महागनरपालिका वडा नम्वर २० भलाम, पोखरा २४ पामे, पौखरा ३१ बेगनास र पोखरा १९ लामाचौरमा एम्बुलेन्स तयारी अवस्थामा राखिएकाे छ ।

एम्बुलेन्स सेवाका लागि ९८४६०२४४४६,९८४२००५१००, ९८०६५२९४६४ र ९८५६०२६५७४ मा सम्पर्क गर्न सकिने छ ।

त्यस्तै बैठकले आगामी दिनको (लकडाउन खुलेपछि) सुरक्षा कार्ययोजना तयार गर्न विज्ञ टिम गठन गर्ने र स्वास्थ्य विज्ञको सुझाव अनुसार कार्ययोजना बनाएर अगाडी बढने निर्णय गरेको समितिका सदस्य सचिव किरण कोइरालाले जानकारी दिए ।

तपाईको प्रतिक्रिया