पोखराको पौरखी समूहले खुवायो १६ हजारलाई खाना, आजैदेखि राेकियाे अभियान

समाधान संवाददाता २०७७ वैशाख १५ गते १९:४२

पोखरा

पोखराको पौरखी स्वयं सेवा समूहले लकडाउनका कारण चुलो बाल्न समस्या भएकाहरुलाई दैनिक खाना खुवाउने कार्यक्रम सोमबार साँझबाट स्थगित गरेको छ ।

अभियानका संयोजक जनक पराजुलीले जिल्ला प्रशासन र पोखरा महानगर पालिकाबाट वैशाख १५ गते सम्मका लागि अनुमति लिएको र सोही अनुसार सोमबार साँझसम्म खाना खुवाएको उनले बताए । लकडाउन थपिए पनि आफूहरुको खाना खुवाउने कार्यक्रम भने नथपिएको उनले जानकारी दिए ।

१० दिनअघि सुरु यो अभियान अन्तर्गत सोमबार साँझसम्म १६ हजार भन्दा बढीले खाना खाएका छन् । पोखराको पौरखी स्वयंसेवक समूहले गासको अभाव झेलिरहेका सर्वसाधारणलाई बसेकै ठाँउमा पु¥याएर खाना खुवाएको हुो । खाना पकाउने जिम्मेवारीसँगै प्याकिङ गर्न बिहान उठेदेखि साँझसम्म समूहका सदस्य व्यस्त थिए । पोखरा–७ स्थित शान्तिनगर बैंक्युटमा खाना पकाउने बन्दोबस्त मिलाइएको छ ।

देश लकडाउनका कारण आफना गाँउघर जान नपाएका सडकमै अलपत्र परेका र काम गर्न नपाएर रासन विहीन भएकालाई पौरखी समूहले खाना खुवाउँदै आएको थियो । युवाहरुको यो समूहले विपन्नलाई निशुल्क खाना खुवाउँदै आएको समूहका संयोजक जनक पराजुलीले बताए ।

खाना नपाएको जानकारी प्राप्त गरेपछि स्थानीय सर्वसाधारण, जनप्रतिनिधि तथा प्रहरीसँग समन्वय गरी खाना पु¥याउँदै आएको समूहका सदस्य विष्णुप्रसाद बरालले बताए । बिहान र बेलुकी खानाको अर्डर अनुसार प्रबन्ध गर्दै आएका उनको भनाइ छ । ९ जना मिलेर आफ्नै खर्चमा निःशुल्क खाना खुवाउने अभियान शुरु गरेको उनले बताए । समूहमा जनक पराजुली, विष्णुप्रसाद पौडेल, राजु शर्मा तिमिल्सिना, भानुभक्त अधिकारी, विष्णुप्रसाद बराल, प्रजापति अधिकारी, शिव थापा, राजेन्द्र पौडेल र खेमराज तिमिल्सिना छन् । उनीहरुलाई १ सय भन्दा बढी स्वयं सेवीले सघाएका थिए ।

सोमबार साँझ सबै स्वयं सेवी सहयोगीहरुलाई धन्यवाद दिँदै समूहका सदस्य विष्णुप्रसाद पौडेलले सहयोगले अभियान सफल भएको बताए । उनले आगामी दिनमा पनि सहयोग आवश्यक परेमा समूह सहयोगका लागि तत्पर रहेको बताए ।

अर्का सदस्य राजु तिमिल्सिनाले १० दिनमा १६ हजार २६ जनालाई खाना खुवाउन पाउँदा खुसी लागेको बताए । दैनिक स्वयं सेवामा खटिएका प्रेमबहादुर जिसीले सहयोग गर्न पाउँदा खुसी लागेको बताए ।

तपाईको प्रतिक्रिया