निजी संस्थाले कर्मचारीलाई दियो राहत

समाधान संवाददाता २०७७ वैशाख १९ गते २०:४०

पोखरा

१ सय ३१ औँ अन्तर्राष्ट्रिय मजदुर दिवसका अवसरमा हेओरुम हिमालय तथा सियोल पोखरा ट्राभल्स एन्ड टुर्स प्रालिले आफ्ना कर्मचारीलाई राहत प्रदान गरेको छ ।


कोरोना भाइरस रोकथामका लागि गरिएको लकडाउनका कारण जीविकोपार्जनमा समस्या परेकाले संस्थामा आबद्ध गाइड, पोटर, कार्यालय कर्मचारी तथा सहयोगीलाई शुक्रबार राहत सामग्री वितरण गरिएको हो ।


संस्थाले आफ्ना कर्मचारीलाई १ बोरा चामल, तेल १ लिटर, ५ किलो आँटा, नुन १ पोका, चना २ केजी, रातो दाल २ केजी, मस्यौरा २ प्याकेट, साबुन (कपडा धुने १, नुहाउने १, भाडा माँझ्ने २) प्रदान गरेको संस्थाका सञ्चालक राजु सुवेदीले बताए ।
कामविहीन भएका ३० कर्मचारीलाई हेओरुम हिमालय तथा सियोल ट्राभल्स एण्ड टुर्सको बजेटबाट राहत वितरण गरिएको सञ्चालक सुवेदीले जानकारी दिए ।

पोखरा महानगरपालिका वडा नं ६ का अध्यक्ष जगतबहादुर पहारी, पोखरा चेम्बर अफ कमर्श कास्कीका अध्यक्ष किसान सुनार, टानका अध्यक्ष हरि भुजेल, नाटाका अध्यक्ष सञ्जयकान्त सिग्देल लगायतको उपस्थितिमा राहत वितरण गरिएको हो ।

तपाईको प्रतिक्रिया