एसके थकाली, जोमसोम

मुस्ताङको थासाङ गाउपालिका–४ घाँसास्थित जनता आधारभूत विद्यालयको सरकारी क्वारेन्टाइनमा १४ दिन पूरा गरी घर फर्किएकाले क्वारेन्टाइन प्रावधान विभेदपूर्ण भएको दुखेसो पोखेका छन् ।

दोस्राे चरणमा क्वारेन्टाइनमा बसेका ४ पुरुष र १ महिलाले आफूहरुलाई मात्र क्वारेन्टाइनमा राखेको तर जिल्ला भित्रिने १ हजार बढीलाई घर पठाइएकोमा असन्तुष्ट‍ि जनाए । पोखरादेखि बेनी हुँदै मुस्ताङ र म्याग्दीको सीमाक्षेत्र घाँसा आइपुगेका उनीहरुलाई १४ दिनअघि स्थानीय तहको सिसिएमसी र सुरक्षाकर्मीले क्वारेन्टाइन पठाएका थिए । क्वारेन्टाइनमा बसेका उनीहरुलाई सिसिएमसीले क्वारेन्टाइन मापदण्ड पूरा गरी निरोगिताको प्रमाणपत्र उपलब्ध गराएको छ ।

वडाध्यक्ष विशाल शेरचनको रोहबरमा उनीहरुलाई घर पठाइएको थियो । क्वारेन्टाइन मापदण्ड पूरा गरेका उनीहरुले त्यहाँ बस्दा कुनै पछुताउ नभएको बताएका छन् । विश्वमै माहामारीको रुप लिएकाे कोरोना भाइरस रोकथाम तथा नियन्त्रणका लागि सबै नागरिक सचेत रहनुपर्ने समेत जनाएका छन् ।

यसअघि सोही क्वारेन्टाइनमा ७ जनाले १४ दिन बिताएर घर फर्किएको थासाङ–४ का वडाध्यक्ष विशाल शेरचनले जानकारी दिए । जनता आधारभूत क्वारेन्टाइनमा कुल १२ जनाले क्वारेन्टाइन मापदण्ड पूरा गरेको शेरचनको भनाइ छ । वडाध्यक्ष शेरचनका अनुसार घासा क्वारेन्टाइमा २ चरणका गरी १२ जना व्यक्तिको र्‍यापिड डाइगोनोष्टिक परीक्षण भएको छ । यस्तै,सोही क्वारेन्टाइनमा सुरक्षा निगरानी गर्दै आइरहेका १४ जना प्रहरी र स्वास्थ्यकर्मी ३ जना, वडासचिव र वडासहयोगीकाे र्‍यापिड परीक्षण भएको हो ।

घासा क्वारेन्टाइनमा बस्ने, रेखदेख गर्ने, स्वास्थ्य परीक्षण गर्ने लगायतका २६ व्यक्तिको र्‍यापिड परीक्षण भएको जनाइएको छ । जिल्ला स्वास्थ्य कार्यालय मुस्ताङका प्रमुख टीकाराम भण्डारीले हालसम्म ५८ जना आरडिटी परीक्षण भएको र सबैको रिपोर्ट नेगेटिभ भएको जानकारी दिए ।

प्रदेश स्वास्थ्य निर्देशनालयले मुस्ताङलाई १ सय २० थान आरडिटी उपलब्ध गराएको थियो । जिल्लास्तरीय सिसिएमसीले ५ सय थान आरडिटी माग गरेको भए पनि माग चौथाइ मात्र उपलब्ध गराइएको थियो । मुस्ताङका ५ पालिकामा ११ सय ४ व्यक्ति होम क्वारेन्टाइनमा छन् । सम्बन्धित पालिकाकाे रेखदेखमा उनीहरुलाई होम क्वारेन्टाइनमा राखिएकाे छ ।

कोरोनाका कारण लामो समयदेखि पोखरा र काठमाडाैं लगायतका स्थानमा अपलत्र परेका मुस्ताङीलाई स्थानीय तहले गाउँ फर्काएका थिए । उनीहरुलाई स्थानीय तहले होम क्वारेन्टाइन, समाजघर, गुम्बा स्कुल र सरकारी विद्यालयमा सुरक्षित एकान्तबास बस्न लगाएको थियो । लकडाउनमा मुस्ताङ आएकामध्ये लोमान्थाङमा २ सय ४९ जना, लोघेकर दामोदरकुण्डमा २ सय ७२ जना, वारागुङ मुक्तिक्षेत्रमा २ सय ७५ जना, घरपझोङमा १ सय ८१ जना र थासाङ गाउपालिकामा १ सय २७ जना व्यक्तिलाई होम क्वारेन्टाइनमा बस्न लगाएको हो । होम क्वारेन्टाइनमा बस्नेहरुको स्थानीय सिसिएमसी समितिको पहलमा नियमित स्वास्थ्य परीक्षण गराइएको छ भने ३ वटै सुरक्षाकर्मी, गाउँ मुखिया र जनप्रतिनिधिले निगरानी गर्दै आएका छन् ।