समाधान संवाददाता

क्वारेन्टाइनमा बस्नुपर्ने डरले घरको तलाबाट हामफालेका पोखराका युवकको आरडिटी परीक्षण रिपोर्ट नेगेटिभ आएको छ ।

भारतको कर्नाटक बैंगलुरुबाट मंगलबार बिहान पोखरा आएका २१ वर्षीय अभिषेक बस्नेतको आरडीटी रिपोर्ट नेगेटिभ आएको हो ।

उनको स्वाब संकलन गरिएको र पीसीआर परीक्षण बुधबार हुने प्रदेश स्वास्थ्य निर्देशनालयका निर्देशक विनोदविन्दु शर्माले जानकारी दिए । ‘उहाँको आरडीटी परीक्षण गरेका थियौं । त्यो नेगेटिभ आएको छ तर प्रोटोकलअनुसार पिसीआर गर्नुपर्ने देखिन्छ,’ उनले भने, ‘पिसीआर परीक्षणका लागि स्वाब संकलन भएको छ । रिपोर्ट बुधबार आउँछ ।’

मंगलबार जनप्रतिनिधि, प्रहरी र स्वास्थ्यकर्मी क्वारेन्टाइनमा लैजान आएको देखेपछि उनी घरको दोस्रो तलाबाट हाम फालेर भाग्ने प्रयास गरेका थिए । तर, सफल भएनन् । उनका आमाबुवा र २ बहिनी पोखरा ८ इन्द्रपुरीटोलमा बस्छन् । उनी रोजगारीका लागि साढे २ महिना पहिला भारतको कर्नाटक बैंगलुरु पुगेका थिए । उनलाई अहिले पोखरा महानगरपालिकाको क्वारेन्टाइनमा राखिएको वडाध्यक्ष रुद्रनाथ बरालले जानकारी दिए ।