काठमाडौ‌ं

नेपाल राष्ट्र बैंकले पूर्वराजाहरुको फोटो अंकित नोट चलनचल्तीमा नल्याउने निर्णय गरेको छ।

राष्ट्र बैंकले आइतबार बैंक तथा वित्तीय संस्थाहरुलाई परिपत्र जारी गर्दै पूर्वराजाको तस्बिर अंकित नोट भए चलन चलतीका लागि बजारमा नपठाउन निर्देशन दिएको हो ।

नेपालमा राजतन्त्र अन्त्य हुने बेलासम्म छापिने नोटहरुमा तत्कालीन राजाको फोटो छाप्ने चलन थियो। बजारमा अझै पनि पूर्वराजा ज्ञानेन्द्र, वीरेन्द्र तथा महेन्द्रका फोटो अंकित नोटहरु पर्याप्त मात्रमा चल्तीमा छन् ।

राष्ट्रबैंकले पूर्वराजाको तस्बिर अंकित भएको नोटलाई पुनः निष्काशन अयोग्य नोटको रुपमा वर्गीकरण गरेको मुद्रा व्यवस्थापन विभागका कार्यकारी निर्देशक विश्रुत थापाले जानकारी दिए। कुनै व्यक्ति वा संस्थासँग भएको नोट लगे त्यस बापत राष्ट्र बैंकले चलनचल्तीका नयाँ नोट दिनेछ।

परिपत्रमा झुत्रिएको, मक्किएको, जलेको, गलेको, लुलो भएको, पानीले भिजेको, नोटमा रहेको अक्षर, अंक चित्र तथा सुरक्षण विशेषताहरु नबुझिने वा बिग्रने गरी रंग लागेको, लेखिएको, कारिएको वा च्याचिएका नोटलाई बैंक तथा वित्तीय संस्थाले पुनः निष्काशन नगर्न भनिएको छ।

राष्ट्र बैंकले जारी गरेको परिपत्रअनुसार अब बैंक तथा वित्तीय संस्थाले काउन्टर, एटीएमलगायत मेसिनबाट प्राप्त चलनचल्तीमा पठाउन काउन्टरबाट भुक्तानी गरी दिने नोटलाई तीनभागमा छुट्याउनु पर्नेछ। एटीएमबाट पठाउने रकमलाई हरियो, काउन्टरबाट पठाउनेलाई सेतो र प्रयोग गर्न नमिल्नेलाई रातो रंगको क्लिप प्रयोग गर्नुपर्नेछ।