समाधान संवाददाता
गृह मन्त्रालयले स्याङ्जाका प्रमुख जिल्ला अधिकारी (सिडिओ) रामबहादुर कुरुम्वाङलाई बाँके सरुवा गरेको छ । स्याङ्जामा सहसचिव हिरालाल रेग्मीको चर्चा चले पनि निर्णय भने भइसकेको छैन ।

मन्त्रालयले ४ जिल्ला बाँके, सप्तरी, पर्वत र जुम्लाका सिडिओको सरुवा क्रममा कुरुम्वाङ बाँके पुगेका हुन् । बाँकेका सिडिओ कुमारबहादुर खड्कालाई भने मन्त्रालयमा तानिएको छ । खड्का अवकाश प्राप्त हुन ३ महिना बाँकी छ ।

कुरुम्वाङ २०७६ कात्तिक १८ गते स्याङ्जा कार्यभार सम्हाल्न आइपुगेका थिए । त्यसअघि उनी बर्दियाको सिडिओ थिए । उनी बर्दिया कार्यरत रहँदा देशभरका सिडिओको कार्यसम्पादन मूल्यांकनमा पहिलो नम्बरमा परेका थिए ।

बाँकेमा पछिल्लो समय कोरोना संक्रमण तीब्र भइरहेका बेला त्यहाँको प्रशासनिक तथा व्यवस्थापकीय सुधारका लागि मन्त्रालयले योग्य ठानेर सरुवा गरेको हुन सक्ने सिडिओ कुरुम्वाङले सुनाए ।

हेरफेर भएको जिल्ला सप्तरीमा गृहले मन्त्रालयकै सहसचिव शंकरहरि आचार्यलाई पठाउने भएको छ । सप्तरीका सिडिओ सुनिल खनाललाई अध्यागमनमा सरुवा गरिएको छ । पर्वतमा शम्भुप्रसाद रेग्मी आउने भएका छन् । पवर्तकी सिडिओ कल्पना घिमिरे नेपाललाई भने चितवनको सहायक सिडिओमा सरुवा गरिएको छ ।

जुम्लामा मन्त्रालयका उपसचिव भूपेन्द्र थापालाई सिडिओमा खटाइएको छ । जुम्लाकी सिडिओ दुर्गा बन्जाडेलाई पाल्पाको सहायक सिडिओमा सरुवा गरिएको छ ।