अर्जुन काफ्ले, स्याङ्जा

स्याङ्जाको वालिङस्थित क्वारेन्टाइनमा रहेका ३ संक्रमित भारतबाट जेठ ११ गते दिउँसो वालिङ आएका हुन् ।

विभिन्न साधन प्रयोग गर्दै सुनौलीसम्म आएका उनीहरु सुनौलीबाट एउटै बसमा वालिङ सम्म आएको जिल्ला प्रहरी कार्यालयले जनाएको छ ।

जिल्लाका ८ पालिकाका ५४ जना एकैपटक एकै समूहमा स्याङ्जामा आएको प्रहरीले जनाएको छ ।

संक्रमित पुष्टि भएकासँगै आउनेमध्ये वालिङ नगरपालिकाका मात्रै २९ जना रहेका छन् भने चापाकोटका ६ जना, गल्याङ्का ८ जना, बिरुवाका ४ जना, हरिनाश २ जना, फेदीखोलाका १ जना, भीरकोटका ३ जना र अर्जुन चौपारीका १ जना रहेको जिल्ला प्रहरी कार्यालयका प्रमख एसपी विमलराज कँडेलले जानकारी दिए ।

वालिङमा रहेका मध्ये १५ जनाको पिसिआर परीक्षणका लागि बुधबार स्वाव पठाइएकोमा तिन जनामा कोरोना भाइरस पुष्टि भएकोे हो । जिल्ला स्वास्थ्य कार्यालयका प्रमुख याम प्रसाद शर्माले जानकारी दिए ।

जेठ ११ गते भारतबाट ठूलो समूहमा जिल्ला आएका वालिङ नगरपालिका ७ घर भएका उनीहरु नगरपालिकाकै क्वारेन्टाइनमा बस्दै आएका छन् ।

बिहीबार पुष्टि भएका संक्रमितमा २२ र २६ वर्षका २ जना पुरुष तथा ३९ वर्ष की १ जना महिला छन् । संक्रमित ३ जनालाई नै सदरमुकामा रहेको जिल्ला अस्पतालमा आइसोलेसनमा ल्याइएको छ ।

गण्डकीमा कोरोना संक्रमितको संख्या १६ पुगेको छ । अहिलेसम्म स्याङ्जाका ५, बागलुङका ८, नवलपुरका ३ जनामा कोरोना देखिएको छ । १६ मध्ये बागलुङका १९ वर्षकी युवती र ६५ वर्षकी वृद्ध निको भएर चैत दोस्रो साता नै घर फर्किसकेका छन् ।