समाधान संवाददाता
पोखरा, १८ जेठ

बन्दाबन्दीले समस्यामा परेका पोखरा–९ का ४२ सुत्केरी गर्भवती, असहाय र एकल महिलालाई ‘माइला कान्छा अभियान’बाट राहत वितरण गरिएको छ ।

टोल विकास संस्था वडा नं ९ समन्वय समितिका अध्यक्ष उत्तम श्रेष्ठको रोहबरमा अभियानकर्मी माया गुरुङ र पार्वती गुरुङले एक बोरा चामल र तेल गरेर ६५ हजार मूल्य बराबरको राहत सामग्री वितरण गरेका हुन् ।
युके निवासी माया र पार्वती गुरुङ नेपाल आएलगत्तै बन्दाबन्दीमा परेपछि समस्यामा परेका विपन्न परिवारलाई अभियानमार्फत राहत संकलन गरेर वितरण गर्दै आएका छन् ।

पोखरा महानगरपालिका— ९ स्थित प्रदर्शनी केन्द्रमा ३० जनालाई र राहत लिन आउन नसकेकालाई घरमै पु¥याएर सहयोग वितरण गरेको अभियानका एक सदस्य माया गुरुङले बताइन् । उनले भनिन्, ‘जीवनयापन सहज हुन सकिरहेको छैन, आपत् विपत्मा परेकाहरूको कष्टकर जीवनलाई देखेपछि हामीले सहयोग अभियान शुरु गरेका थियौं, यसमा निरन्तररूपमा युके निवासी सामाजिक व्यक्तिहरूले आर्थिक सहयोग गर्दै आएका छन् । हामी लक्षित वर्गसम्म पुगेर सहयोग गरिरहेका छौं ।’ उनले अहिलेको सहयोग युके निवासी इन्द्रकुमारी र शिवकुमारी गुरुङले संकलन गरेर ६५ हजार पठाएकोे जानकारी दिइन् ।

अभियानका अर्का सदस्य पार्वती गुरुङ मानवीय सेवा नै धर्म भएको बताउँछिन् । ‘कोरोना त्रासले मानवीय जीवन नै संकटमा पर्दैछ, रोगले भन्दा पनि भोकले मरिने समस्या देखिन थालेको छ । राहत वितरणमा हिँड्दा पनि उत्तिकै जोखिम छ । यो हाम्रो पाँचौँ चरणको अभियान हो । सकेको सहयोगमा जुटेका छौं,’ उनले भनिन् ।

राहत वितरणको समन्वय गरेकी कांग्रेस नेतृ सरस्वती गुरुङले अहिलेको जटिल अवस्था महिला सुत्केरी, गर्भवती, असहाय, अपांगता भएको व्यक्ति, एकल महिला बढी प्रभावित भएको बताइन् । महिलाको वास्तविक अवस्था महिलाले नै बुझ्न सक्ने भन्दै माइला कान्छा अभियानका माया र पार्वती गुरुङ विशेष धन्यवादको पात्र भएको उनले बताइन् । हालसम्म १५ लाख मूल्य बराबरको सहयोग गरेको अभियानले जनाएको छ ।