जलविद्युत आयोजनाका मजदुरलाई नारच्याङ गाउँ प्रवेशमा रोक

समाधान संवाददाता २०७७ जेठ २१ गते ६:०७

राकेश शर्मा
म्याग्दी, २१ जेठ

म्याग्दीको अन्नपूर्ण गाउँपालिकामा सञ्चालित जलविद्युत आयोजनाहरुमा काम गर्न बाहिरबाट ल्याइएका मजदुरलाई गाउँ प्रवेशमा रोक लगाएपछि मजदुर अलपत्र परेका छन् । विभिन्न गाउँबाट २÷३ दिन लगाएर आएका ३० जना मजुरहरु सडकमा नै अलपत्र परेका हुन् ।

अन्नपूर्ण गाउँपालिका–४ नारच्याङमा निर्माणाधीन निलगिरी क्यासकेट ६२ मेघावट जलविद्युत आयोजनामा काम गर्नको लागि सल्यान, सिन्धुपाल्चोक र नुवाकोट लगायतका ठाउँबाट ल्याईएका मजदुरहरुलाई स्थानीयबासीले गाउँ प्रवेशमा रोक लगाएका हुन् ।


निलगिरीको ठेकेदार कम्पनीले ऊर्जा मन्त्रालयको अनुमति र कोरोना जोखिमलाई मध्यनजर गर्दै आरडिटी परीक्षण गरेर मात्रै आयोजनामा काम गर्नको लागि मजदुर ल्याएको जनाए पनि स्थानीयबासीले गाउँमा बाहिरबाट कसैलाई पनि प्रवेश नदिने भन्दै उनीहरुलाई प्रवेश गर्न दिएका छैनन् । गाउँ प्रवेशमा रोक लगाएसँगै आफूहरु अलपत्र पर्ने अवस्थामा आएको मजदुरका नाइके प्रेम बस्नेत बताउँछन् ।


कम्पनीले स्थानीयबासी र जनप्रतिनिधिसंग समन्वय गरिरहेको भनेको छ, तर कहाँ बस्ने, के खाने ठेगान नभएको उनीहरुको भनाई छ । सिन्धुपाल्चोकबाट समेत काम गर्न पाउने र नपाउने निक्यौैल नभएको र आउँदा ल्याएका खर्च समेत सकिएको उनीहरुको बताउछन् ।

सिई कन्ट्रक्सन मार्फत आयोजनामा काम गर्नको लागि मन्त्रालय मार्फत अनुमति पाएर आफूहरु यहाँसम्म आएको र राती गाडीमै सुत्नुपर्ने अबस्था रहेको अर्का मजदुर कालु तामाङले बताए ।

अन्नपूर्णकै वडा नम्बर ६ घारमा निर्माणाधीन घारखोला जलविद्युत आयोजनामा काम गर्न ल्याइएका मजदुहरुलाई समेत स्थानीयबासीले गाउँमा नल्याउन चेतावनी दिएपछि पोखरेबगरमै रोकिएका छन् ।

नारच्याङ गाउँ प्रवेश गर्ने कालिगण्डकी नदीमाथि निर्माण गरिएको मोटरेवल पुलमा छेकबार लगाएर स्वयंसेवक खटिएर गाउँ प्रवेशमा कडाई गरिएको स्थानीय युवा विवेक पुर्जाले बताए ।

विभिन्न जोखिमयुक्त ठाउँबाट आउनेहरुमा कोरोना संक्रमण हुन सक्ने र गाउँमा फैलन सक्ने जोखिमलाई मध्यनजर गर्दै गाउँलाई स्थानीयले पूर्ण रुपमा बाहिरबाट आउन रोक लगाएका छन् ।

यता जिल्ला प्रशासनले जलविद्युत आयोजनाहरुले जिल्ला प्रशासन, स्थानीयबासी र स्थानीय तहसँग समन्वय नै नगरिकन बाहिरबाट मानिस ल्याएको बताएको छ ।

तपाईको प्रतिक्रिया