समाधान संवाददाता
पोखरा, २२ जेठ

पाल्पाको मिसन अस्पतालमा उपचारका क्रममा मृत्यु भएका कोरोना संक्रमित जेठ १८ गते भारतको मुम्बईबाट गाउँ फर्केको गाउँपालिकाले जनाएको छ ।

पाल्पाको पूर्व खोला गाउँपालिका १ सिलुवा घर भएका ४५ वर्षे पुरुष ती पुरुष मुम्बईबाट सुनौली हुँदै पाल्पा पुगेका थिए । सुनौलीबाट उनी आएको गाडीमा अरु २६ जना पनि रहेको पूर्वखोला गाउँपालिकाका अध्यक्ष नुनबहादुर थापाले जानकारी दिए ।

उनीहरु सबैलाई पूर्व खोला गाउँपालिका वडा २ जल्पास्थित शम्भु माविको क्वारेन्टाइनमा राखिएको थियो । सँगै आएकामध्ये ती पुरुषलाई उच्च ज्वरो आउने समस्या देखिएपछि सदरमुकाम तानसेनको मिसन अस्पताल भर्ना गरिएको थियो । उनको मंगलबारै निधन भए पनि बिहीबार मात्र भैरहवास्थित प्रदेश जनस्वास्थ्य प्रयोगशालामा पिसिआर रिपोर्ट पोजेटिभ आएको हो ।

मृत्यु भएका व्यक्तिमा कोरोना देखिएपछि उनीसँगै आएका अन्यको पनि पिसिआर परीक्षणका लागि नमुना लिने तयारी भइरहेको गाउँपालिका अध्यक्ष थापाले बताए । मगर थरका ती व्यक्ति विगत २ दसकदेखि मुम्बईमा कार्यरत थिए । सामान्य आर्थिक अवस्थाका उनको परिवारका अन्य सदस्य गाउँमै खेतीकिसानी गर्दै आएको छ । परिवारमा पत्नी, २ छोरी र १ छोरा छन् ।

नेपाली सेनाको टोलीले जिम्मा लिएर बिहीबार नै उनको अन्तिम संस्कार गरेको छ । उनको दाहसंस्कार कसरी गर्ने भन्ने बारेमा केहीबेर अन्यौल भएको थियो । सरकारले कोरोना संक्रमितको दाहसंस्कार कार्यविधि परिमार्जन गरी आफन्तले लगेर आफ्नो धार्मिक परम्परा अनुसार गर्न सकिने उल्लेख गरेको छ ।

पहिलाको कार्यविधिमा आफन्तले टाढाबाट मात्र हेर्न पाउने तर छुन नपाउने उल्लेख थियो । परिवारसँग गाउँपालिका अध्यक्ष, जिल्ला प्रशासन कार्यालयका प्रतिनिधिले गरेको छलफलका क्रममा उनको दाहसंस्कार नेपाली सेनाको टोलीले नै गर्ने सहमति जुटेको थियो । तानसेन बजारभन्दा पश्चिमको जंगलमा उनको दाहसंस्कार गरिएको (गाडिएको) गाउँपालिका अध्यक्ष नुनबहादुर थापाले जानकारी दिए ।