काठमाडाैं

कोरोना भाइरस संक्रमणबाट मृत्यु भएकाहरुको शब व्यवस्थापनसम्बन्धी कार्यविधिमा उल्लेख गरिएको मृत्युको परिभाषा विवादमा मुछिएपछि १ दिनमै स्वास्थ्य तथा जनसंख्या मन्त्रालयले संशोधन गरेको छ।

मन्त्रालयले बुधबार जारी गरेको संशोधित कार्यविधिमा संक्रमण भए पनि अन्य रोग भएका व्यक्तिको मृत्यु भएमा त्यो संक्रमणबाट मृत्यु नभएको मानिने उल्लेख गरिएको थियो।

उक्त मृत्युको परिभाषालाई लिएर विरोध सुरु भएपछि मन्त्रालयले बिहीबार त्यसमा संशोधन गरेको गरिएकाे हाे ।

मृत्युको उक्त परिभाषा विश्व स्वास्थ्य संगठनको परिभाषा विपरीत भएको र यसले कोरोनाको तथ्यांक बिगार्ने भएको भन्दै विरोध भएपछि मन्त्रालयले त्यसको परिभाषा परिवर्तन गरेको हो।

स्रोत भन्छ,‘विज्ञहरुसँग छलफल नगरी मन्त्रालयका एक दुई जना चिकित्सकले टेबलमा बसेर यो परिभाषा तयार पारेका थिए। अन्तर्राष्ट्रिय मापदण्ड के छ भन्नेबारे उनीहरुले बेवास्ता गर्दा यस्तो परिणाम आएको हो। यस्ता अन्य कयौँ निर्णय छन् जो विवादमा परेका छन्।’

संशोधित कार्यविधिमा कुनै पनि क्वारेन्टिन (सर्भिलेन्स) मा बसेका कोरोना भारसका लक्षण भएका, त्यसको रिपोर्ट भएका र त्यसबाट गम्भीर भएका बिरामीहरुको मृत्यु भएमा त्यसलाई कोरोनाबाट मृत्यु भएको मानिने उल्लेख गरिएको स्रोतको भनाई छ।

यस्तै कार्यविधिमा कुनै पनि बिरामीको कोरोना पुष्टि भएर उपचार हुने बेला मृत्यु भएमा त्यसलाई पनि कोरोनाका कारण मृत्यु भएको मानिने उल्लेख गरिएको छ।

तर कोरोना भएर निको भएकाहरुको मृत्यु भने कोरोनाबाट मृत्यु भएको नमानिने कार्यविधिमा भनिएको छ। देशसञ्चारबाट