हेम्जामा मानवसेवा आश्रमको भवन शिलान्यास

समाधान संवाददाता २०७७ जेठ २५ गते १९:४७

समाधान संवाददाता

मानवसेवा आश्रमको गण्डकी प्रदेश शाखाको भवन शिलान्यास भएको छ । सहयोगापेक्षी सडक आश्रित मानवहरुको सेवाका लागि पोखरा महानगरपालिका –२५ हेम्जामा निर्माण हुने उक्त भवनको गण्डकी प्रदेशका मुख्यमन्त्री पृथ्वीसुब्बा गुरुङले आइतबार शिलान्यास गरे ।

सडक आश्रित मानवको अभिभावकत्व ग्रहण गर्न सरकार तयार रहेको र १ करोड २४ लाख बजेट छुट्टयाइएको मुख्यमन्त्री गुरुङले जानकारी दिए । उनका अनुसार सहयोगापेक्षीको उद्धार र संरक्षणका लागि भइरहेको भौतिक संरचना निर्माणको जिम्मा प्रदेश सरकारले लिने छ ।

आश्रमका केन्द्रीय अध्यक्ष रामजी अधिकारीले मानवीय सेवाको पवित्र कार्यमा धेरै व्यक्तिको साथ र सहयोगले भवन निर्माण अघि बढ्न लागेको बताए ।

आश्रमका लागि लमजुङ र गोरखा शाखामा पनि जग्गा प्राप्त भएको र भवन निर्माणका लागि ५०/५० लाख विनियोजन भएको उनको भनाइ थियो ।

आश्रमका प्रदेश संयोजक होमनाथ तिमिल्सिनाले सातै प्रदेशका १४ जिल्ला र १९ सेवा केन्द्रबाट करिब १ हजार १ सय सहयोगापेक्षी सडक आश्रित मानवको सेवा गरिएको जानकारी दिए ।

उनका अनुसार पोखरा –१७ छोरेपाटनमा सञ्चालित आश्रममा मासिक ८० हजार भाडा तिरेर हाल १ सय २७ जनालाई आश्रय दिइएको छ ।देशलाई नै सहयोगापेक्षी सडक आश्रित मानवमुक्त निर्माण घोषणा गर्ने अभियान अगाडि बढाइएको तिमिल्सिनाले बताए ।

हेम्जामा बन्न लागेको मानवीय स्मारक भवनका लागि लक्ष्मीनारायण गुठी प्रतिष्ठानले ६३ रोपनी जग्गा उपलब्ध गराएको प्रतिष्ठानका उपाध्यक्ष ऋषि सापकोटाले जानकारी दिए ।

तपाईको प्रतिक्रिया