हरिदेवी कोइरालालाई गण्डकी नारी सम्मान

समाधान संवाददाता २०७७ जेठ २७ गते ६:४१

पोखरा

विश्वको पहिलो महिला क्लब लायन्स क्लब अफ पोखरा गण्डकीले लोक गायिका प्राज्ञ हरिदेवी कोइरालालाई गण्डकी नारी सम्मान –२०७७ बाट सम्मान गरेको छ ।


बन्दाबन्दीमा भर्चुअल प्रविधिको प्रयोग गरेर नगद २५ हजार सहित सम्मान गरिएको क्लबका अध्यक्ष हीरा भट्टराईले बताइन् । अहिलेको अवस्थामा जमघट गरेर कार्यक्रम गर्न सम्भव भएन, त्यसैले क्लबका सदस्य र लिडरहरुको भर्चुअल उपस्थितिमा सम्मान गरेकाे उनले जनाइन् । क्लबको याे सातौं सम्मान रहेको र हरेक वर्ष विभिन्न क्षेत्रमा योगदान पुर्‍याएका एक महिलालाई नगद सहित सम्मान गर्दै आएको जानकारी उनले दिइन् ।

सम्मान कार्यक्रममा लायन्स इन्टरनेसनल डिस्ट्रिक्ट ३२५ बी १ का गर्भनर इन्दु लम्सालले समय परिस्थिति अनुकुल नहुँदा पनि प्रविधिको प्रयोगमार्फत निरन्तरता दिएर सम्मान कार्यक्रम गर्नु सह्रानीय भएको बताइन् । शब्दद्धारा सम्मान व्यक्त गर्दै उनले लोक गायिका कोइरालाले नेपाली लोक संस्कृतिको विकासमा पुर्‍याएको योगदानको चर्चा गरिन् ।

पूर्व गर्भनर धनराज आचार्यले समाजको हरेक गतिविधिमा सक्रिय महिला क्लबले कोरोना बीच पनि फरक ढ‌ंगले सम्मान कार्यक्रम गरी उदाहरणीय कार्य गरेको बताए ।


सम्मानित लोक गायिका कोइरालाले कोरोना बीचको सम्मान जीवनकालको विल्कुल फरक र अविस्मरणीय रहेको धारणा राखिन् । सम्मानले लोक संस्कृति विकासमा निरन्तर लाग्ने प्रेरणा मिलेको उनकाे भनाइ थियो ।
क्लबका ५५ जना सदस्य र आमन्त्रित व्यत्तित्व सहित भर्चुअल कार्यक्रममा को चिफ एडभाइजर सुचित्रा थापा, लायन्स लिडर इन्दिरा बराल, शारदा पराजुली, साधना चालिसे लगायतले सम्मानित व्यक्तिलाई शुभकामना दिएका थिए ।

तपाईको प्रतिक्रिया