समाधान संवाददाता
पोखरा, २७ जेठ

पोखरा महानगरपालिका वडा नम्बर १६ बाटुलेचौरको महेन्द्रगुफास्थित विपन्न वर्गका स्वर्गीय बलबहादुर नेपालीको परिवारको घर टहरो निर्माणको लागि सोमबार जस्तापाता प्रदान गरिएको छ ।

हिमालय क्लब बाटुलेचौरको अगुवाइ र गण्डकी प्रदेश सभाका सदस्य तथा नेपाल कम्युनिस्ट पार्टी (नेकपा) कास्कीका अध्यक्ष कृष्ण थापाको सक्रियतामा ३० हजार बराबरको जस्तापाता प्रदान गरिएको हो ।

आर्थिक अभावको कारण उनको घर टहरोको निर्माण कार्य १ वर्ष देखि अधुरो रहेको थियो । कार्यक्रममा गण्डकी प्रदेश सभाका सदस्य थापाले सिंगो पार्टी र सामाजिक संघ संस्थाहरु साझेदारीमा विपन्न गरिबहरुको हक हितका लागि काम गर्ने बताए । उनले सामाजिक न्याय र जातीय सद्भाव कायम गर्नका लागि सरोकारवालाहरु एकजुट हुने उल्लेख गरे ।

गैसस महासंघ नेपालका केन्द्रीय महासचिव रामप्रसाद सुवेदीले सामाजिक संघसंस्थाहरुले समुदायका समस्या उजागर गर्ने मात्र नभएर राज्यको ध्यान नपुगेको क्षेत्रमा सहयोगको कार्यक्रम लैजाने बताए । हिमालय युवा क्लबका अध्यक्ष मोहनबहादुर थापाले जनस्तरबाट २ लाख १० हजार आर्थिक सहयोग जुटाएर क्लवले घर टहरो निर्माण गरी हस्तान्तरण गर्ने योजना सुनाए ।

क्लवका कोषाध्यक्ष शिवराज देवकोटाले आर्थिक अवस्था कमजोर रहेको नेपालीको परिवारको घर टहरो निर्माणको लागि सहयोग संकलन अभियान चलाएको बताए । उनले अहिलेसम्म ४० भन्दा बढी सहयोगीहरुबाट १ लाख ९५ हजार संकलन भएको जानकारी दिए । कार्यक्रममा पोखरा महानगरपालिका वडा नम्बर १६ का अध्यक्ष जीवन आचार्य, क्लबका प्रथम उपाध्यक्ष सुशील बस्नेत, मानार्थ सदस्य उदयबहादुर बस्नेत लगायतले बोलेका थिए ।