पोखरामा उपचाररत संक्रमितको इम्युनिटी बढाउन राउतले दिए आयुर्वेद औषधि

समाधान संवाददाता २०७७ जेठ २८ गते १८:४२

समाधान संवाददाता
पोखरा, २८ जेठ

पोखरा स्वास्थ्य स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पतालको आइसोलेसनमा उपचाररत कोरोना भाइरस संक्रमितको इम्युनिटी पावर बढाउन आयुर्वेद औषधि वितरण गरिएको छ ।

पोखरा तेर्सापट्टीस्थित कुशुम कृष्ण आयुर्वेद फर्माका सञ्चालक कृष्ण राउतले रोग प्रतिरोधात्मक क्षमता बढाउने विभिन्न प्रकारका औषधि प्रतिष्ठानका निर्देशक डा अर्जुन आचार्यलाई हस्तान्तरण गरेका हुन् ।

Advertisement

आइसोलेसनमा रुपा गाउँपालिका २ र पोखरा महानगरका २ गरी ४ जना उपचाररत छन् । उनीहरुको रोग प्रतिरोध क्षमता बढाउन आयुर्वेद तथा वैकल्पिक चिकित्सा विभागले जारी गरेको प्रोटोकल अनुसारको औषधि उपलब्ध गराएको राउतले जानकारी दिए ।

च्यावन प्राश, अश्व गन्धा चूर्ण, तुलसी चिया, यष्ठि मधु चूर्ण, त्रिकटु चूर्ण, गुडुची चूर्ण उपलब्ध गराइएको हो । संक्रमितको उपचारमा खटिने अग्र भागका स्वास्थ्यकर्मीलाई पनि औषधि उपलब्ध गराएको राउतले जनाए ।

Advertisement

स्वास्थ्य तथा जनसंख्या मन्त्रालय अन्तर्गतको आयुर्वेद तथा वैकल्पिक चिकित्सा विभागले कोरोनाको उपचार तथा खोप तयार नभइसकेको अवस्थामा रोग प्रतिरोधात्मक क्षमता बढाउने गुण भएका जडिबुटीहरुको प्रयोग गर्न सुझाव दिएको छ ।

अस्पतालमा बुधबारदेखि नै आयुर्वेदिक औषधि प्रयोग प्रोटोकल अनुसार नै थालिएको छ । संक्रमितहरुको तनाव व्यवस्थापनका लागि योगाभ्यास र प्राणायाम पनि सुरुआत गर्ने तयारी अस्पतालको छ ।

विभागद्वारा जारी कोभिड १९ रोकथाम एवं व्यवस्थापन सम्बन्धी निर्देशिका बमोजिम कार्ययोजना तय गरी आयुर्वेद औषधीको प्रयोग थालिएको छ ।
गण्डकी आयुर्वेद औषधालय कास्कीका प्रमुख आयुर्वेद चिकित्सक डा कुमार कासुलाले गण्डकी प्रदेश स्वास्थ्य निर्देशनालयका आयुर्वेद तथा वैकल्पिक चिकित्सा शाखासँगको समन्वयमा आयुर्वेद औषधी प्रयोग थालिएको बताए ।

संक्रमित र क्वारेन्टिनमा रहेका व्यक्तिहरुको स्वास्थ्य क्षमता बढाई कोरोना विरुद्ध लड्न सक्ने बनाउन आयुर्वेद औषधि उपयुक्त रहने विश्वास राउतको छ ।

राउतको सक्रियतामा सामाजिक विकास मन्त्रालय, प्रदेशका जिल्लाहरु तनहुँ, बागलुङ, म्याग्दी, स्याङ्जा, पर्वतमा निशुल्क औषधि वितरण भइसकेको छ । गोरखा र नवलपुरमा समेत वितरणको तयारी रहेको उनले सुनाए ।

तपाईको प्रतिक्रिया