समाधान संवाददाता

सरकारले जारी राखेको लकडाउनको असर सहरमा अझै छ । सहरले कोरोना भाइरसबाट पुनर्जीवन पाउन समय लिने पक्का छ ।

तर कृषिमा रमाउने पोखरेली उद्यमीलाई कृषि कर्ममा लकडाउनले कुनै असर पारेको छैन ।

पोखरा १९ पुरुन्चौरमा अहिले धमाधम रोपाइँ चलिरहेको छ ।

५ युवा मिलेर स्थापना गरेको पञ्चामृत एग्रो टुरिजम फार्मले त्यहाँ रोपाइँ गरिरहेको छ ।

कोरोना भाइरसका कारण कृषि कर्मलाई विशेष आकर्षणको रुपमा चर्चा गरिरहँदा उक्त फार्मले भने उल्लेखनीय रुपमा फिल्डमै उत्रिएर कामलाई महत्व दिएको छ ।

५० रोपनी खेतीयोग्य जमिन भाडामा लिइ गत मंसिरबाट सञ्चालन थालिएको उक्त फार्मले पहिलो चरणमा धान रोप्न थालेको हो ।

फार्मका सञ्चालक नवराज अधिकारीले झन्डै १२ रोपनीमा हाइब्रिड धानको बिऊ रोपिएको जानकारी दिए ।

‘वडा कार्यालयले पहेँले धानलाई अनुदानको रुपमा दिइने जानकारी आएपछि हामीसँग उपलब्ध जमिनमा लगाउने तय गरेका छौं,’ उनले भने, ‘फार्मको योजना विस्तारित क्रममा रहेकाले सम्पूर्ण कृषिजन्य उत्पादनलाई महत्वका साथ अघि बढाइने छ ।’

३० वटा भैँसी पाल्ने योजनाका साथ गोठ निर्माण गरिने अधिकारीले सुनाए । तरकारीबालीका लागि ५ वटा टनेल तयार भएको र २ वटा थप्ने योजना रहेको उनले बताए ।

‘हामीले यस फार्ममा कृषि उत्पादनका विभिन्न चक्रहरुलाई विस्तृत रुपमा देखाउन मिल्ने गरी निर्माण गर्दै छौं,’ उनले भने । फार्मले होमस्टे समेत सञ्चालनमा ल्याउने तयारी गरेको छ ।

नवराज अधिकारी, नरेन्द्रकुमार कार्की, दुर्गाप्रसाद सुवेदी, श्याम लामिछाने, मधु चापागाईँ मिलेर उक्त फार्म सञ्चालनमा ल्याएका हुन् ।

हेरौं रोपाइँका केही तस्बिर