खै पठाउन मन लागेर पठाउनु भयो होला । स्वासप्रस्वासको कुनै समस्या छैन

Advertisement

निर्देशक
डा. अर्जुन आचार्य
पश्चिमाञ्चल क्षेत्रीय अस्पताल

अनुप पौडेल
पोखरा, २९ जेठ

स्याङ्जा वालिङका २ जना कोरोना संक्रमितलाई उपचारका लागि पोखरा ल्याइएको छ । दुवैलाई बुधबार साँझ पश्चिमाञ्चल क्षेत्रीय अस्पताल ल्याइएको हो ।

स्वासप्रस्वासमा समस्या देखिएपछि उपचारका लागि २ जनालाई पोखरा पठाइएको वालिङ नगरपालिकाका स्वास्थ्य महाशाखा प्रमुख कमल पाण्डेले जानकारी दिए । हेलुको कालिका सामुदायिक अस्पतालको क्वारेन्टाइनमा बसेका वालिङ १३ का ५४ र ३२ वर्षीय पुरुषलाई पोखरा ल्याइएको हो ।

२४ जेठमा संक्रमण पुष्टि भएका उनीहरु बाबुछोरा हुन् । स्वासप्रस्वासमा समस्या देखिएपछि पोखरा पठाइएको भनिए पनि पश्चिमाञ्चल क्षेत्रीय अस्पतालले दुवैमा कुनै समस्या नरहेको जनाएको छ । ‘खै पठाउन मन लागेर पठाउनु भयो होला । स्वासप्रस्वासको कुनै समस्या छैन,’ अस्पतालका निर्देशक डा. अर्जुन आचार्यले भने ।

वालिङका २ सहित कास्कीका ४ संक्रमितको अहिले पोखरामा उपचार भइरहेको छ । सबै संक्रमितको स्वास्थ्य अवस्था सामान्य रहेको निर्देशक आचार्यले जानकारी दिए ।

स्याङ्जामा अहिलेसम्म ३८ जनामा कोरोना संक्रमण पुष्टि भएको छ । तीमध्ये ३ जना निको भएर घर फर्किएका छन् भने १ जनाको मृत्यु भएको छ । संक्रमितमध्ये अधिकांश वालिङ नगरपालिकाका छन् ।

जिल्लाका संक्रमितमध्ये १ महिलाबाहेक अरु सबै संक्रमित पुरुष हुन् । संक्रमित ३९ वर्षीया महिलालाई केही समय पोखरास्थित क्षेत्रीय अस्पतालको आइसोलेसन वार्डमा ल्याएर उपचार गरिएको थियो ।

जिल्ला अस्पतालमा महिलाका लागि छुट्टै आइसोलेसन नभएपछि १५ जेठमा ती महिला संक्रमितलाई पोखरा ल्याइएकोमा २४ जेठमा जिल्ला फर्काइएको थियो । उनको हाल स्याङ्जाको हेलुस्थित कालिका सामुुदायिक अस्पतालमा उपचार भइरहेको छ ।

संक्रमित सबैलाई सम्बन्धित पालिकाले नेपाल–भारत सीमाबाट उद्धार गरेर आफ्नो क्वारेन्टाइनमा राखेका थिए । भारतबाटै आएका वालिङका ५८ वर्षीय पुरुषको भने गत आइतबार पोखरामा उपचारको क्रममा मृत्यु भएको छ ।

श्रीमतीसँग दिल्लीबाट जेठ २१ गते फर्किएका उनी सिकिस्त बिरामी भएपछि नगरपालिकाले निजी कार पठाएर सुनौली नाकाबाट उद्धार गरेको थियो । जिल्ला आएको भोलिपल्ट उपचार गर्न पोखरा आएका उनको संक्रमण पुष्टि भएकै दिन जेठ २५ गते मृत्यु भएको हो ।

उनी कोरोनाबाट मृत्यु हुने गण्डकी प्रदेशका पहिलो व्यक्ति हुन् । स्याङ्जामा संक्रमितको उपचार गर्न जिल्ला अस्पताल र भीरकोट नगरपालिका १ हेलुस्थित कालिका सामुदायिक अस्पताललाई प्रयोग गरिएको छ ।

गण्डकी प्रदेशमा अहिलेसम्म १ सय ४७ जनामा कोरोना संक्रमण पुष्टि भएको स्वास्थ्य निर्देशनालय गण्डकीले जनाएको छ । तीमध्ये ११ जना कोरोनालाई जितेर घर फर्किएको निर्देशक विनादविन्दु शर्माले जानकारी दिए । घर फर्किनेमा बागलुङका ६, स्याङ्जाका ३, लमजुङ र नवलपुरका १/१ जना छन् ।