भरत कोइराला
पोखरा, ३० जेठ

पोखराका पहिलो कोरोना संक्रमित पुरुष निको भएर शुक्रबार घर फर्केका छन् । काठमाडौंको धुम्बाराहीस्थित ह्याम्स अस्पतालमा उपचारपछि शुक्रबार दिउँसो उनलाई डिस्चार्ज गरिएको उनकी पत्नीले समाधान न्यूजलाई जानकारी गराइन् ।

उनले भनिन्, ‘अस्पताल र घर नजिकै छ, कोरोनाको तेस्रो रिपोर्ट नेगेटिभ आयो, मेनिन्जाइटिसको औषधीको कोर्स पनि सकिएपछि चिकित्सकले डिस्चार्जको सल्लाह दिएका हुन् ।’

पोखरामा प्राध्यापन र वकालतमा क्रियाशील ६० वर्षे ती पुरुषलाई जेठ २० गते पोखराबाट हेलिकोप्टरमा काठमाडौं लगिएको थियो । पोखराको आलुमाइला चोक नजिकै बस्ने उनी बिहान कोठामा अचेतअवस्थामा देखेपछि सरसफाइ गर्ने महिलाले हार गुहार गरी तत्कालै गण्डकी मेडिकल कलेज पु¥याएकी थिइन् ।

बेलुका खाना खाएर सुतेका उनी बिहान ४ बजेतिर असहज महसुस भएपछि उठेका थिए । कपडा लगाएर साथीभाइलाई फोन गरी अस्पताल जाने तयारी गर्दै गर्दा कतिबेला बेहोस भएँ आफूलाई ख्याल नभएको बताएका छन् । पोखरामा परीक्षण गर्दा उनको शरीरमा सोडियमको मात्रा अत्यन्तै कम देखिएको थियो । काउठमाडौंमा थप परीक्षण गर्दा मेनिन्जाइटिस देखिएको थियो

त्यहाँ उनको प्रारम्भिक उपचारका साथै आवश्यक परीक्षण गरेपछि हेलिकोप्टरबाट काठमाडौं लगिएको थियो । २० गते मंगलबार काठमाडौं लगिएका उनमा २३ गते कोरोना पोजेटिभ देखिएको थियो । त्यसपछिका २ रिपोर्ट लगातार नेगेटिभ आएपछि उनलाई डिस्चार्ज गरिएको अस्पतालले जनाएको छ ।

उनलाई काठमाडौं पुर्‍याउन हेलिकोप्टरमै काठमाडौं गएर फर्केका २ सहित ती पुरुषको सिधा सम्पर्कमा आएका ३९ जनाको पिसिआर रिपोर्ट पनि नेगेटिभ आइसकेको छ ।

ह्याम्स अस्पतालका कार्यकारी निर्देशक डा. ज्योतिन्द्र शर्माका अनुसार नेपालमा निजी अस्पतालमा कोरोना संक्रमितको उपचार भएको यो पहिलो केस हो । बिरामीका परिवारले ह्याम्समै उपचार गर्ने भनेपछि आफूहरुले उपचार गर्न तयार रहेको उनले जनाए । उक्त अस्पतालमा अहिले पनि गुल्मीका ७६ वर्षे पुरुषको उपचार भइरहेको छ ।