पर्वतमा पहिराेले जनधनकाे क्षति पुर्‍याएकाेमा मुख्यमन्त्रीद्वारा दुख व्यक्त

समाधान संवाददाता २०७७ जेठ ३२ गते ११:२२

पाेखरा

पर्वतको कुश्मा नगरपालिका-३, दुर्लुङ, ढकालबारीमा शनिबार रातिको भिषण वर्षाका कारण गएको पहिरोमा परी ठूलो जनधनको क्षतिप्रति गण्डकीका मुख्यमन्त्री पृथ्वीसुब्बा गुरुङले दुख व्यक्त गरेका छन् ।

मुख्यमन्त्री गुरुङले फेसबुक पेजमा आइतबार बिहान सन्देश जारी गरी पहिरोमा परी मृत्यु हुनेहरुप्रति श्रद्धाञ्जली व्यक्त गरेका छन् । बेपत्ता भएकाहरु सकुशल फेला पर्ने अपेक्षासहित खोजी तथा उद्धार कार्यमा जुट्ने सवैप्रति उनले धन्यवाद प्रकट गरेका छन् ।

पर्वतकाे कुश्मा नगरपालिका ३ दुर्लुङ ढकालबारिमा शनिबार राति गएकाे पहिराेमा परी ६ जनाकाे मृत्यु भएकाे छ भने ३ जना हराइरहेका छन् ।

शनिबार राति ८ बजेतिर गएकाे पहिराेमा पुरिएका स्थानीय तुलबहादुर थापा, मीनकुमारी थापा र नातिनी विविशा थापाकाे शव राति नै भेटिएकाे थियाे । तुलबहादुर र मिनकुमारी पतिपत्नी हुन् भने विविशा नातिनी हुन् ।

आइतबार बिहान भेटिएका ३ जनाकाे नाम खुलेकाे छैन ।

शनिबार राति २ घर बगाउँदा सम्राट थापा, दीपा थापा, विवेक थापा, कमला विक, जेनिस विक र प्रमिशा विक हराइरहेका थिए ।

राति नै घटनास्थलमा पुगेकाे आर्मी, नेपाल प्रहरी र सशस्त्र प्रहरीकाे टाेली पुगेर खाेजी र उद्धार थालेकाे थिए ।

घटनास्थल नजिकै रहेका अन्य थप ३ घर परिवार जाेखिमाा परेपछि अन्यत्र सुरक्षित स्थानमा सारिएको पर्वत प्रहरी प्रमुख डिएसपी विश्वराज अधिकारीले बताए ।

रातिमा पानी परेकाले उद्धारमा समस्या परेकाे थियाे । बिहान भने माैसम खुलेकाले सुरक्षाकर्मी र स्थानीयकाे सक्रियतामा खाेजी कार्य जारी छ ।

तपाईको प्रतिक्रिया