समाधान संवाददाता, पोखरा

गण्डकी प्रदेश सभा सदस्य राजीव गुरुङ (दीपक मनाङे)ले अर्थ तथा विकास समितिको सदस्यबाट राजीनामा दिएका छन् । समितिका सभापति दीपक कोइरालालाई शुक्रबार राजीनामा बुझाएको सांसद गुरुङले समाधानलाई बताए ।

कामै नभएको समितिमा बसिरहनु औचित्य नदेखेकाले राजीनामा दिएको उनको भनाई छ । ‘ठेक्का पट्टामा मन्त्रीका नजिकका मान्छे इन्जिनियर छन् । अनुगमन गर्ने भनेको त्यस्तै हो ।’ उनले समाधानसंग भने, ‘समितिमा हुँदा म पनि अनुगमनमा गएँ । तर भत्ता मात्र लिने काम जस्तो देखियो । अनियमतता देखिएपनि कारवाही गर्ने अधिकारै छैन ।’

गिटी वालुवको टेन्डरमा ठूलो भ्रष्टाचार रहेको उनले बताए । कर्मचारी, नेतादेखि सबै मिलेर दोहन गरिरहेको उनको आरोप छ । ‘कोत्रेमा हेर्नुस् न मुख्यमन्त्रीदेखि मन्त्री सबै त्यहीँ बाटो ओहोरदोहोर गर्छन्,’ उनले भने, ‘तर त्यहाँ भइरहेको चरम दोहनको वास्तै गर्दैनन् ।’

नामको मात्र समिति भएको र कुनै पनि अधिकार प्राप्त नभएकाले औचित्य विहीन समितिमा बस्न आफैंलाई लाज लागेर राजीनामा दिएको उनले सुनाए ।