एसके थकाली, जोमसोम

कोरोना भाइरस पुष्टि भएका ८३ वर्षीय मुस्ताङको तिब्बती शरणार्थी क्याम्पमा बस्ने एक बृद्धसहित बसमा आएका २४ जनाको रिपोर्ट शनिबार नेगेटिभ आएको जिल्ला स्वास्थ्य कार्यालय मुस्ताङले जनाएको छ ।

मुस्ताङ आउने क्रममा आरडिटी परीक्षण गर्दा क्याम्पका बृद्धलाई आरडिटी पोजेटिभ देखिएको थियो । उनको पहिलो पिसिआर रिपोर्ट पोजेटिभ देखिएपछि पुन दोहाेर्‍याएर स्वाब पोखरा पठाइएको स्वास्थ्य कार्यालयले बतायो । उनीसँगै उनको सुसार गर्न बसेका ज्वाइँकाे पनि पुन स्वाब पोखरा पठाइएको छ । संक्रमित पुष्टि भएका बृद्धसहित गत जेठ ३२ गते छैरो तिब्बती क्याम्पका २० जना व्यक्ति र बसका चालक तथा सहचालक ३ जना र अर्को एक व्यक्ति समेत गरी २४ जना काठमाडाैंबाट मुस्ताङ आएका थिए ।

म्याग्दी र मुस्ताङको सीमाक्षेत्रमा स्वास्थ्य परीक्षण गर्दा बृद्धलाई पोजेटिभ देखिएको थियो । क्याम्पका सबैजनालाई होम क्वारेन्टाइनमा बस्न लगाइएको थियो भने बृद्ध र ज्वाइँ २ जना जोमसोम अस्पतालको आइसोलेसनमा राखिएको थियो ।

क्याम्पका बृद्धलाई कोरोना पुष्टि भएपछि स्थानीय प्रशासनले क्याम्प सिल गरेको थियो ।

मुस्ताङमा अहिले सम्म ५० जनाको पिसिआर परीक्षण भइसकेको छ भने ३ जनाको रिपोर्ट आउन बाँकी छ ।