समाधान संवाददाता, पोखरा

गण्डकी प्रदेशका ४ जिल्लामा सलह कीरा देखिएको छ । मंगलबारसम्म प्रदेशका ४ जिल्लामा बाली नासक सलह कीरा देखा परेको भूमि व्यवस्था, कृषि तथा सहकारी मन्त्रालयले जनाएको छ ।

कास्की, लमजुङ, नवलपुर र स्याङ्जामा सलह देखिएको हो । पाल्पासँग सिमा जोडिएको स्याङ्जाको कालिगण्डकी गाउँपालिका हुँदै गण्डकी प्रदेशमा सलह भित्रिएको मन्त्रालयका वरिष्ठ बाली संरक्षण अधिकृत विनोद हमालले बताए।

उनका अनुसार पाल्पा–स्याङ्जा सिमानाको रानी महलबाट सलह गण्डकी प्रदेश भित्रिएका छन् ।

त्यहाँबाट सलहका ५ वटा झुण्ड स्याङ्जा छिरेको उनले बताए । अधिकृत हमालले समाधानसँग भने, ‘गण्डकी प्रदेशमा अहिलेसम्म रानीमहल हुँदै ५ वटा झुण्ड भित्रिएका छन् । २ वटा झुण्ड गल्मीतिर गएको जानकारी छ ।’

गण्डकी प्रदेशमा रहेका ३ झुण्डमध्ये २ वटा झुण्ड कालिगण्डकी गाउँपालिकाको जंगलमा बसेको छ । एउटा झुण्ड कालिगण्डकी नदीको तिरैतिर पर्वत पुगेको पाइएको छ । सलह ठूलो झुण्डमा देखिने र अहिलेसम्म गण्डकीमा ठूलो क्षति नपुगेकाले त्रसित नहुन हमालले आग्रह गरे ।

कास्कीको रुपा गाउँपालिका–७ काउरेमा सोमबार सलहको एउटा समूह बास बसेको मन्त्रालयले जनाएको छ ।

‘अहिलेसम्मको स्थिति हेर्दा यो कीरा नदी, खोलाको छेउछाउमा देखिएको छ । रुपामा कताबाट आइपुग्यो भन्ने यकीन गर्न सकिएको छैन,’ वागवानी विकास अधिकृत अर्जुनदेव ज्ञवालीले थपे, ‘एक ठाउँमा सय वटा आएर बस्यो भने अन्त सबै गएको छैन । त्यहाँबाट तितरबितर भएको देखियो ।’

कहाँ कहाँ देखियो सलह ?