पोखरामा प्रधानमन्त्री ओलीको समर्थनमा प्रदर्शन

समाधान संवाददाता २०७७ असार १९ गते १३:४०

समाधान संवाददाता, पोखरा

सत्तारुढ दल नेकपाभित्र बढ्दो टकरावका कारण प्रधानमन्त्री केपी शर्मा ओलीको पार्टी भित्रैबाट राजीनामा माग भइरहँदा पोखरामा भने उनलाई हटाउन नहुने माग सहित युवाहरु सडकमा उत्रिएका छन् ।

बिहीबार काठमाडौंको माइतीघर मण्डलामा समेत ओली समर्थित युवा तथा विद्यार्थी संगठनमा आबद्ध नेता कार्यकर्ताहरुले प्रदर्शन गरेका थिए । शुक्रबार बिहानै पोखराको मानवअधिकार चोकमा ओली समर्थित प्रदर्शन भयो ।

ओलीलाई प्रधानमन्त्रीबाट हटाउन नपाइने भन्दै उनीहरूले ‘भारतीय दलाल होसियार’, ‘आज होइन भोलिलाई ५ वर्ष ओलीलाई’, ‘स्थिर सरकार जनताको चाहना’लगायतका नारा लगाए।

झन्डै एक सय जनाको उपस्थिति रहेको प्रदर्शनमा सहभागीहरू बिहानैदेखि पानी परिरहेकाले रेनकोट र छाता ओढेर प्रदर्शनमा सहभागी भए ।

प्रदर्शन लगत्तै कोण सभालाई सम्बोधन गर्दै अपेक्षा अधिकारीले प्रधानमन्त्री ओलीकै कारण देशको स्वाभिमान कायम रहेको बताइन् ।

‘प्रजातन्त्र आएदेखि झुकेको शिर पहिलो पटक देशले उठाएको छ,’ उनले भनिन्, ‘कालापानी, लिपुलेक र लिम्पियाधुरा र कालापानी नेपालका नक्सामा ओलीले नै ल्याउनुभएको हो।’

भारतले लगाएको नाकाबन्दी परास्त गर्ने नेता ओली भएकाले उनकै नेतृत्वमा सरकार स्थिर रहनुपर्ने बताइन् ।

सहभागीहरुले स्थिर सरकारले मात्र समृद्ध मुलुकको सपना साकार हुने भन्दै सरकार ढाल्ने खेलमा नलाग्न पार्टीका नेताहरुलाई आग्रह सहितका नाराबाजी गरेका थिए ।

तपाईको प्रतिक्रिया