सुशील सुवेदी
वालिङ

पछिल्लो समय स्थानीय तहले कृषि सडक र ग्रामीण सडकलाई प्राथमिकतामा राखेका छन् । हिउँदमा सडक खन्ने तर वर्षातको ख्याल नगर्ने प्रवृत्तिले सडक तलमाथिका घरहरु पहिरोको जोखिममा परेका छन् । जिल्लाको ११ वटै स्थानीय तहमा निर्माण गरिएका ग्रामीण सडक छेउछाउका घर पहिरोको जोखिममा पर्न थालेसँगै स्थानीय त्रसित छन् ।

स्याङ्जाको ११ वटै स्थानीय तहमा खनिएका ग्रामीण सडक खण्ड अन्तर्गत सयौँ घर पहिरोको जोखिममा छन् ।

Advertisement

गल्याङ ९ चितडाँडामा आधा दर्जन घर पहिरोको जोखिममा छन् । करादी—उमाकोट सडक खनिएपछि बाटोमुनिको घरमा भेल पस्ने र बाटो माथिको घर भुन्डिने अवस्थामा छ । स्थानीय गुनाखर खनाल भन्छन्, ‘सडक निर्माण गर्दा प्राविधिक परामर्श नभएको कारण यहाँका घर उच्च जोखिममा छन् । नयाँ सडक खन्दा पर्खाल उठाउन र पहिरोको जोखिम मूल्यांकन गर्न आवश्यक छ ।’

अहिले गल्याङको ४, ६, ९, १० लगायत वडामा दर्जन घर जोखिममा छन् । स्याङ्जाको ११ वटै स्थानीय तहमा खनिएका ग्रामीण सडक खण्ड अन्तर्गत सयौँ घर पहिरोको जोखिममा छन् । अव्यस्थित र प्राविधिक परामर्शबिना सडक खन्दा ग्रामीण क्षेत्रका सयौं घरहरु जोखिममा परेको स्थनीयबासीको गुनासो छ ।

कोरोनाको विपदसँगै प्राकृतिक विपदले स्थानीय तह अझ मर्कामा परेका छन । भूगोलको हिसाबले पनी विकास निर्माण कार्य गर्दा समस्या आएको बताउँदै विपद रहात कोषमार्फत पहिरो नियन्त्रण गरिने गल्याङ नगर प्रमुख भूपराज अधिकारीले सुनाए । उनले भने, ‘विकासको पहिलो आधार सडक भएपनि हाम्रो भूगोलले विकासलाई साथ दिएको छैन । उच्च जोखिममा रहेका घरधुरीलाई पहिलो चरणमा त्रिपाल वितरण गरेका छौँ, वर्षातपछि आवश्यक ठाउँमा वाल उठाउनेछौं ।’

केही दिनअघि गल्याङ ९ मा गएको पहिरोले १ जनाको ज्यानसमेत गएको थियो । गल्याङ ९ साङ्लिया स्थित ४९ वर्षीय यामबहादुर विकको घर पछाडिबाट आएको पहिरोले विकको ज्यान गयो भने उनकी श्रीमती फूलमाया विक घाइते भएकी थिइन् ।