पोखरा

बागलुङको क्वारेन्टिनमा मृत्यु भएका युवाको रिपोर्ट पोजेटिभ आएको छ ।

बागलुङ जिल्लाको निसीखोला गाउँपालिका वडा नम्बर २ का २९ वर्षीय सुनिल विकको पोखरास्थित क्षयरोग केन्द्रको प्रयोशालामा परीक्षणमा रिपोर्ट पोजेटिभ आएको स्वास्थ्य कार्यालय बागलुङका प्रमुख सुरज गुरौले जानकारी दिए ।

लामो समयदेखि फोक्सोको बिमारी उनी ढोरपाटन नगरपालिका ४ स्थित छोरेगाउँ माविको क्वारेन्टाइनमा शनिबार राति उनको मृत्यु भएको छ । उनको स्वाब भने पहिले नै पठाइएको थियो ।

उनी लकडाउन अघिनै भारतमा उपचारका लागि गएका थिए । उपचार सम्भव नभएर फर्केपछि क्वारेन्टाइनमा राखिएको थियो । क्वारेन्टाइनमै शनिबार राति मृत्यु भएको हाे ।

पहिला उत्तरगंगा माविको क्वारेन्टाइनमा राखिएकोमा बिरामीको अवस्था नाजुक देखेपछि उनलाई नजिकै रहेको ससुराली घर पठाइएको थियो ।

वडा कार्यालयले सूचना पाएपछि फेरि उनलाई घर नजिकैको छोरेगाउँ माध्यमिक विद्यालयमा बनाइएको क्वारेन्टाइनमा सारिएको थियो । उनको घर परिवारका अन्य ३ जनाको भने रिपोर्ट नेगेटिभ आएको छ ।

योसँगै गण्डकीमा कोरानाबाट मृत्यु हुनेको संख्या ४ पुगेको छ । स्याङ्जाका २ र गोरखाका १ पुरुषको कोरोना संक्रमण पुष्टि भएपछि मृत्यु भइसकेको छ ।