सत्तारुढ नेकपाको स्थायी कमिटी बैठक फेरि स्थगित भएको छ । आज सोमबार २२ गतेका लागि डाकिएको बैठक स्थगित भएको हो ।

’दुई अध्यक्षबीच विवाद भएपछि हामीले अझै छलफल गर्नुपर्छ भनेर बैठक स्थगित भयो ,’ स्रोतले भन्यो । २४ गते बस्ने गरी बैठक स्थगित भएको हो ।

दुई अध्यक्षको बैठक सकारात्मक भए मात्र स्थायी कमिटी बस्ने एक नेताले बताए ।
प्रधानमन्त्री तथा नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल ’प्रचण्ड’ ले आइतबारको भेटमा आआफ्नो अडान यथावत् राखेका छन्।

पार्टीमा विवाद चर्किरहेका बेला नेकपाका वरिष्ठ नेता माधव कुमार नेपाल र चिनियाँ राजदूत होउ यान्छीबीच भेटवार्ता भएको छ ।

आइतबार साँझ नेकपाका विदेश विभाग प्रमुख माधव कुमार नेपाललाई भेट्न राजदूत होउ उनकै निवास कोटेश्वर पुगेकी थिइन् । नेकपा फुटको संघारमा पुगेको चर्चा चलिरहेको बेला चिनियाँ राजदूतको यो भेटलाई अर्थपूर्ण मानिएको छ ।