समाधान संवाददाता, पोखरा

झमझम पानी परेको बिहीबारको रात दुर्गाबहादुर सुनार सधैं झै पोखरा २६ पैतेडाँडाको आफ्नै घरमा सुतेका थिए । बिहान अबेरसम्मै निदाए ।

शुक्रबार बिहान झन्डै ७ बजे श्रीमती उठेर उनलाई ‘माथिबाट पहिरो आउलाजस्तो छ बाहिर जाऊँ’ भनेकी थिइन् । उनी उठेनन् ।

श्रीमती र २ छोराछोरीसँगै बस्दै आएका सुनार अघिल्लो रात खाना खाएर सुतेका थिए ।

रातभर परेको भारी वर्षाले उनको घरमाथिको भिरालो जमिनको माटो गलायो । श्रीमती छोराछोरी लिएर घर बाहिर निस्किइन् तर दुर्गाबहादुर घरभित्रै माटोले पुरिए ।

डाँडाकोनाक प्रहरी चौकीका प्रमुख तथा डिएसपी अर्जुन रानाभाटका अनुसार उनी निद्रामै भएकाले पहिरोले पुरिएको अनुमान छ ।

सशस्त्र प्रहरी बल र नेपाल प्रहरी टोलीले घटनाको २ घन्टापछि उनको पुरिएको अवस्थाबाट बाहिर निकालेको थियो । उनी मृत भेटिए ।

पैतेडाँडा भिरालो जमिन भएकाले भारी वर्षासँगै पहिरोको जोखिम उत्तिकै छ । दुर्गाबहादुरको परिवारजस्तै पैतेमा अन्य घरपरिवार पनि पहिरोको उच्च जोखिममा छन् ।

उनीहरुलाई जोखिम टार्न स्थानीय सहितको सहयोगमा नजिकैको विद्यालयमा स्थानान्तरण गरिएको छ ।

पोखरा २६ का वडाध्यक्ष नारायणप्रसाद बरालले ३५ परिवारका १ सय ४० जनालाई अमरज्योती आधारभूत विद्यालयमा स्थानान्तरण गरिएको जानकारी दिए ।

‘पहिरोको जोखिममा परेका परिवारलाई सुरक्षित स्थानमा व्यवस्थापन गरेका छौं,’ उनले भने, ‘मेयर, उपमेयर, सिडिओ साप आएर निरीक्षण गरेर जानुभएको छ । राहत लगायतको काम पनि प्रक्रियामा छ ।’

विद्यालयमा राखिएको घरपरिवारलाई खाना खुवाउन सामाजिक संघसंस्थाको पहलमा तयारी भइसकेको वडाध्यक्ष बरालले जानकारी दिए ।

०७५ मा समेत सोही डाँडामा बर्खाको समयमा पहिरो जाँदा ४ जनाले ज्यान गुमाएका थिए । अधिकांश ज्याला मजदरी गर्दै आइरहेका घर परिवार सुकुम्बासीमा बस्दै आइरहेका छन् ।