पोखरा

पोखरा महानगरपालिकाको विपद् व्यवस्थापन कोषमा पाल युवाम नामग्याल थुप्तेन दारगेलिङं (स्कुल) फाउन्डेसन पोखराले ५० हजार रुपैयाँ सहयोग गरेको छ ।

गण्डकी प्रदेशका सांसद इन्द्रधारा विष्ट, पाल युवाम नामग्याल थुप्तेन विद्यालयका प्रिन्सिपल ग्याच्छो गुरुङ, शिक्षक छिमे गुरुङ र सोनाम लामासहित टोलीले पोखरा महानगरका प्रमुख मानबहादुर जिसी र उपप्रमुख मञ्जुदेवी गुरुङलाई संयुक्त रुपमा उक्त रकमको चेक हस्तान्तरण गरे ।

कोरोना भाइरसको कहरसँगै फेरि बाढी पहिराको विपद्को सामना गर्नुपरेको बताउँदै सांसद इन्द्रधारा विष्टले संकटका बेला सबैले सहयोग गर्नुपर्ने बताए । उनले उक्त फाउन्डेसन महानगरमा रहेकाले दुःखमा साथी बन्नेको सुनाए । पोखरा महानगरका प्रमुख मानबहादुर जिसीले कोरोनासँगै बाढी पहिरोले नागरिकले ज्यान गुमाएको जानकारी गराए ।

फाउन्डेसनले पोखरा महानगरपालिकाभित्र ५ सय परिवारलाई राहत समेत वितरण गर्ने भएको छ । कोरोनाबाट चुल्हो बाल्न अप्ठेरो भएका र बाढी पहिरोबाट विस्थापित हुनुपरेका परिवारलाई राहत वितरण गर्ने बताइएको छ । महानगरसँगको समन्वयमा उक्त राहत वितरण गरिने छ ।