समाधान संवाददाता
वालिङ

वालिङ नगरपालिका ८ को श्रवणकुमार पार्कमा शनिबार वृक्षरोपण गरिएको छ । वालिङ नगरपालिका, युएनडिपी नेपाल र दियालो संस्थाको आर्थिक सहयोग तथा स्थानीय नवप्रभात युवा क्लवको साझेदारीमा बिरुवा रोपिएको हो ।

युएनडिपी नेपालको ‘प्लान्टेसन क्यापेन टु सपोर्ट ग्रीन रिकोभरी फ्रम द पान्डेमिक्स’ कार्यक्रम अन्तर्गत विभिन्न जातका बिरुवा रोपिएको हो ।

कार्यक्रममा नगरप्रमुख दिलीपप्रताप खाँणले श्रवणकुमार पार्कलाई आन्तरिक पर्यटकको गन्तव्य बनाउनका लागि नगरपालिकाले सहयोग गर्ने बताए । उनले नगरभित्र पार्क तथा पर्यटकीय क्षेत्र बनाउन पनि विभिन्न संघसंस्थाको सहयोग आवश्यक पर्ने बताए । स्वस्थ तथा हराभरा नगर बनाउनका लागि आफूहरुको जोड रहेको नगरप्रमुख खाँणको भनाइ छ ।

उनले वालिङ बजारभन्दा केहीमाथि र रेडियो आँधीखोला भन्दा तलको भागमा रहेको पार्कलाई व्यवस्थित गर्न सकिएमा धार्मिक तथा पर्यटकीय सम्भावना रहेको धारणा राखे ।

कार्यक्रममा नगर उपप्रमुख कल्पना तिवारीले पर्यटकीय क्षेत्रको निर्माणसँगै संरक्षणमा समेत सबै लाग्नुपर्ने बताइन् । सबैको सहकार्यमा नै पार्क तथा अन्य पर्यटकीय स्थलको निमार्ण गर्न सकिने उनको भनाइ छ ।

वालिङ नगरपालिका वडा नं. ८ का अध्यक्ष कमलप्रसाद सुवेदीले वडाभित्र रहेका खुला जग्गालाई विस्तारै हरियाली बनाउँदै लगिने बताए । उनले पार्क निर्माणका लागि वडाबाट समेत आवश्यक सहयोग गर्ने प्रतिबद्धता जनाएका छन् ।

कोभिड १९ प्रभावितका लागि लक्ष्य गरी कार्यक्रम सुरु गरिएको दियालो संस्थाका अध्यक्ष कविता तिवारीले जानकारी दिइन् । उनले भनिन्, ‘पार्क तथा हरियाली बातावरण बनाउनका लागि संस्थाले निरन्तर सहकार्य गर्नेछ ।’

कायक्रममा श्रवणकुमार प्रतिष्ठानकाका जिल्ला अध्यक्ष सीताराम अधिकारी, दियालो युएनडिपीका कार्यक्रम प्रमुख राधाकृष्ण डुम्रे लगायतले बोलेका थिए ।

पार्क भित्र रहेको खाली जग्गामा बिरुवा लगाई व्यवस्थित पार्कमा परिणत गर्ने आफूहरुको लक्ष्य रहेको नवप्रभात युवाक्लवका अध्यक्ष जीवलाल काफ्लेले जानकारी दिए ।

वालिङ बजारबाट नजिकै भएकाले आफूहरु व्यवस्थित पार्क निर्माणमा लोगको निर्माण एबं संरक्षण समितका सचिव मुक्ति सुवेदीको भनाइ छ ।

नवप्रभात युवाक्लब र प्रभात आमा समूहको सक्रियतामा वृक्षरोपण गरिएको हो ।