समाधान संवाददाता, पोखरा

पोखरा महानगरपालिकामा सोमबारदेखि प्रमुख प्रशासकीय अधिकृतको जिम्मेवारी सहसचिव महेश बरालले सम्हालेका छन् । बराललाई महानगरका कर्मचारी लगायतले स्वागत गरे ।

उनी असार १२ गते सहसचिवमा बढुवा भएका थिए । महानगर आउनुअघि सम्पत्ती शुद्धिकरण विभागमा बराल कार्यरत थिए । बराल यसअघि २०७१ मा तत्कालीन पोखरा उपमहानगरको कार्यकारी अधिकृतमा ६ महिना काम गरेका थिए ।

आफ्ना कार्ययोजना भन्दा जनप्रतिनिधिकै निर्णय कार्यान्वयनमा भूमिका निर्वाह गर्ने बरालले समाधानलाई बताए । ‘अहिले मेरो भूमिका कर्मचारीको रुपमा मात्र रहन्छ,’ उनले भने, ‘जनप्रतिनिधिले गरेका निर्णयलाई कार्यान्वयन गराउने चरणमा भूमिका निर्वाह गर्नेछु ।’